Қазақстандық шахматшы Жансая Әбдімәлік Германияның әлемге әйгілі «Баден-Баден» клубымен келісімшартқа қол қойды, деп хабарлайды "Ұлт ақпарат" Қазақстанның Шахмат федерациясына сілтеме жасап.
«Баден-Баден» әйелдер клубы классикалық шахматтан да, жылдам шахматтан да әлем чемпионы атанған ең мықты шахматшыларды қатарына қосып келеді.
Элиталық клубтың құрамында: Хоу Ифань (Қытай), Анна және Мария Музычуктар (Украина), Александра Костенюк (Ресей), Антоанета Стефанова (Болгария) сияқты мықтылар бар.
«Баден-Баденнің» ерлер командасы да осал емес: Фабиано Каруана, Максим Вашье-Лаграв, Вишванатан Ананд, Левон Аронян, Петр Свидлер сияқты саңлақтар да осы клубтың мүшелері.
2019/2020 жылғы маусымда Жансая командаластарымен бірге 11 тур ойнайды, содан кейін 2020 жылдың мамырында Бундеслиганың жеңімпазы анықталады.
Жансая бірінші турда швед қызы Инна Агресті жеңіп, Германиядағы мансабын сәтті бастады.
«Баден-Баден» командасының капитаны жас әрі мықты шахматшыны қатарына қосып алғанына қуанып отырғанын жеткізді.
1137 рет оқылды
