Танымал журналист, шығыстанушы Ғалым Боқаш "Qazaqstan" Ұлттық телеарнасының "Жер-жиһан" бағдарламасын жүргізетін болды.
Бұл туралы «Қазақстан» РТРК» АҚ-ның басқарма төрағасы Ерлан Қарин хабарлады. Ол фейсбуктегі парақшасында: "Ұлттық арнаның жаңа бағдарламасын қарсы алыңыздар! Енді әлемдегі оқиғаларға өзіндік жан-жақты сараптамамен әр сенбі сайын сағат 20.35-те "Жер Жиxан" бағдарламасынан таныса аласыздар! Ең бастысы, кім жүргізетінін қараңыз! Ұлттық арна эфиріне кімнің оралғанын байқадыңыз ба?", - деп жазды.
Ғалым Боқаш 2001-2005 жылдары «Қазақстан» республикалық телерадиокорпорациясы» АҚ қоғамдық-саяси бағдарлама редакциясының жетекшісі, Ақпараттық-талдау бағдарламасының директоры және «Мезгіл» сараптамалық бағдарламаларының жүргізушісі, басқарма төрағасының орынбасары қызметтерін атқарған болатын.
Кеше, яғни, 11 қараша күні "Жер-жиһан" бағдарламасының алғашқы шығарылымы көрерменге жол тартты. Халықаралық ақпараттық-сараптамалық бағдарлама Чехияның Прага қаласынан жүргізілмек. Атылмаш хабар әр сенбі сайын сағат 20.35-те көрсетіледі.
Айта кетсек, Ғалым Қабдулұлы Боқаш 1976 жылы 19 маусымда Шығыс Қазақстан облысы Мақаншы ауданында дүниеге келген. Әл-Фараби атындағы Қазақ ұлттық университетін тәмамдаған. Пәкістанда, Үндістанда, Жапонияда еңбек өтілінен өткен. «Дарын» мемлекеттік Жастар сыйлығының, «Алтын Жұлдыз» сыйлығының, Қазақстан Республикасы Президентінің Бұқаралық ақпарат құралдары саласындағы сыйлығының лауреаты.
7588 рет оқылды
