بٷگٸن فۋتبولدان قازاقستان كۋبوگى توپتىق كەزەڭٸ ەكٸنشٸ تۋرىندا الماتىنىڭ «قايراتى» ٶز الاڭىندا اقتاۋلىق «كاسپييدەن» جەڭٸلٸپ قالدى, دەپ حابارلايدى "ۇلت اقپارات".
كەزدەسۋ بارىسىندا «قايرات» جاسىل الاڭعا نەگٸزٸنەن جاستاردى شىعاردى. ال «كاسپيي» تەجٸريبەلٸ ويىنشىلارىنا سەنٸم ارتتى. اقتاۋلىق كلۋبتان 39-مينۋتتا نيكولا تسۋتسكيچ ەسەپ اشتى. ەكٸنشٸ كەزەڭنٸڭ 54-مينۋتىندا الەكسەي زەلەسكيي ەسەپتٸ ٷستەمەلەي تٷستٸ. نەتيجەسٸندە «كاسپيي» سىرت الاڭدا قارسىلاسىنان 2:0 ەسەبٸمەن باسىم تٷستٸ.
بٸرٸنشٸ توپتا ويىن كٶرسەتەتٸن تٷركٸستان وبلىسىنىڭ «ماقتارالى» ٶز الاڭىندا «تارازعا» 1:2 ەسەبٸمەن جەڭٸلدٸ. كەزدەسۋدە الاڭ يەلەرٸنەن ەدٸگە ورالباي 16-مينۋتتا ەسەپ اشقان بولاتىن. دەگەنمەن ماقتارالدىق مارلەن ايمانوۆ 28-مينۋتتا اۆتوگول اۆتورى اتانىپ, تارازى باسى تەڭەستٸ. ال 41-مينۋتتا تارازدىق ۋروش نەنادوۆيچ مەرگەندٸك تانىتىپ, كەزدەسۋ نٷكتەسٸن قويدى.
ورالدا جەرگٸلٸكتٸ «اقجايىق» ٶز الاڭىندا قىزىلوردانىڭ «كايسارىن» قابىلداعان بولاتىن. ەكٸ كوماندا 0:0 ەسەبٸنە قاناعات بٸلدٸردٸ.
ەسكە سالساق, 16 شٸلدەدە «استانا» «اقتٶبەنٸ», «شاحتەر» «قىزىلجاردى» 3:2 ەسەبٸمەن جەڭسە, «توبىل» «اتىراۋدى» 2:0 ەسەبٸمەن تٸزە بٷكتٸردٸ.
ەندٸ 18 شٸلدەدە №8 بجمورسم (نۇر-سۇلتان) مەن «ورداباسى» (شىمكەنت), «تۇران» (تٷركٸستان) مەن «جەتٸسۋ» (تالدىقورعان) ەكٸنشٸ تۋردى تٷيٸندەيدٸ.
ايتا كەتسەك, بيىل اتالعان دودا جاڭا تالاپتار بويىنشا وينالادى.
توپتىق كەزەڭدە پرەمەر-ليگانىڭ 14 كومانداسى مەن ٸرٸكتەۋ كەزەڭٸنەن ٸركٸلمەي ٶتكەن بٸرٸنشٸ ليگانىڭ ەكٸ كلۋبى تٶرت توپقا بٶلٸنگەن.
