كٶرنەكتٸ مەملەكەت جەنە قوعام قايراتكەرٸ, الاش-وردا اۆتونومييالى ٷكٸمەتٸنٸڭ تٶراعاسى, التى الاشتىڭ رۋحاني كٶسەمٸ ەليحان بٶكەيحاننىڭ ەلگە بەيمەلٸم تاعى بٸر سۋرەتٸ تابىلدى. بۇل فوتوقۇجات رەسەي مۋزەيلەرٸنٸڭ گوسكاتالوگ سايتىندا جارييالانعان.
حاباردى بەلگٸلٸ عالىم, الاشتانۋشى, جۋرناليست سۇلتان حان اققۇلى ٶزٸنٸڭ ەلەۋمەتتٸك جەلٸدەگٸ پاراقشاسىندا بٶلٸستٸ.
"سٷيٸنشٸ, الاش ازاماتتارى! التى الاش كٶسەمٸ ەليحان بٶكەيحاننىڭ تاعى بٸر جاڭا فوتوسۋرەتٸ تابىلدى. بۇل جولى دا تاريحي فوتوقۇجاتتى ەرٸپتەسٸمٸز, تاياۋدا دا عانا الاش تاقىرىبىن زەرتتەپ, ناسيحاتتاۋعا قوسقان ٷلەسٸ ٷشٸن "قازاق رەسپۋبليكاسىنا 100 جىل" تٶسبەلگٸسٸمەن (مەدالٸمەن) ماراپاتتالعان ٸزدەنٸمپاز جۋرناليست سەرٸكبول حاسان قازبالاپ جٷرٸپ تاۋىپ الىپتى. سەرٸكبولعا الاش ارۋاقتارى اتىنان الاش قايراتكەرلەرٸنٸڭ سٶزٸمەن تەڭٸرٸ جارىلقاسىن ايتامىن!ال ەندٸ سۋرەتتٸڭ ٶزٸنە كەلسەك, فوتوقۇجاتتا ومبى قالاسىندا شىعا باستاعان ەڭ العاشقى بەيرەسمي تەۋەلسٸز "ستەپنوي كراي" گازەتٸنٸڭ ۇجىمى بەينەلەنٸپتٸ: ٷشٸنشٸ قاتاردا سولدان وڭعا قاراي تٶرتٸنشٸ تۇرعان جاس ەليحاننىڭ بەينەسٸ كٶزگە وتتاي باسىلادى. ەگەر ەليحاننىڭ "ستەپنوي كراي" گازەتٸندە سانكت-پەتەربور وقۋى مەن "توبىل ەكسپەديتسيياسىنان كەيٸن ومبىعا ورالعان 1895-دان 1897 جىلعا دەيٸن قىزمەت ٸستەگەنٸن ەسكەرسەك, بۇل فوتوسۋرەت سول كەزەڭ ارالىعىندا تٷسٸرٸلگەن بولسا كەرەك. ەليحان ول كەزدە 29-31 جاستا بولاتىن" - دەپ جازدى ول Facebook-تاعى پاراقشاسىندا.
