Фото: gov.kz Ержан АшықбаевҚР Сыртқы істер министрлігі АҚШ-тың жаңадан сайланған президенті Дональд Трамптың инаугурациясына кім қатысатыны туралы мәлімет берді, деп хабарлайды Ult.kz.
20 қаңтар күні Вашингтонда өтетін салтанатты рәсімде Қазақстан атынан АҚШ-тағы төтенше және өкілетті елші Ержан Ашықбаев қатысады. Ол 2021 жылдың 5 сәуірінен бастап осы қызметті атқарып келеді. Бұған дейін, 2013 жылдан 2021 жылға дейін, Сыртқы істер министрінің орынбасары лауазымында жұмыс істеген.
Инаугурация – АҚШ президентінің қызметіне ресми түрде кірісу рәсімі. Бұл шарада қазіргі президент өз өкілеттілігін сайланған президентке тапсырады.
Айта кетсек, 2024 жылдың 5 қарашасында АҚШ-та кезекті президент сайлауы өтті. Негізгі үміткерлер – республикалық партия атынан Дональд Трамп және демократиялық партиядан Камала Харрис болды. Бұл сайлауда 47-ші президентті таңдау жүзеге асты. Трамп сайлауда барлық негізгі штаттарда жеңіске жетіп, Вашингтон уақытымен түнгі сағат 2:00-де (Астана уақыты бойынша 12:00-де) жеңімпаз деп жарияланды.
Сайлауда америкалықтар президентпен қоса, вице-президентті, конгрестің 468 мүшесін, 11 штаттың губернаторларын және жергілікті өзін-өзі басқару өкілдерін де таңдады.
152 рет оқылды
