Көрнекі фото: John Harper / Getty Images
"Самұрық-Қазына" қорының төрағасы Нұрлан Жақыпов Қазақстанда атом электр станциясының құрылысын жоспарлаудағы қиындықтарға тоқталды, - деп хабарлайды Tengrinews.kz сайты.
Қордың баспасөз брифингінде Жақыпов атом электр станциясын салу мәселесін көтерді. Оның айтуынша, шешім әлі қабылданбаған.
"Қазақстанда АЭС бола ма, жоқ па, шешу үшін көптеген фактор бар. Осы шешімді қабылдағаннан кейін қандай өндіруші немесе сатушымен салатынымыз туралы айта аламыз. Бүгін атом электр станциясы салынатын жерге қатысты мәселелер бар екенін көріп отырмыз. Біз түсінуіміз керек және орын туралы шешім қабылдауымыз керек, өйткені бірқатар талап бар, соның ішінде - су мен экология", - деді Жақыпов.
Ол Қазақстанда су мәселесі өткір мәселе екенін түсіндірді.
"Атом электр станциясына қойылатын талаптардың бірі - жақсы су қоймасының болуы. Мен есептерді оқып жатырмын, Каспий кірмейді, Балқаш та таязданып жатыр. Егер қазір орынды таңдап, атом электр станциясын салсақ, ал 10 жылдан кейін су тағы 10 метрге тартылса, сонда не болады? Бәрі өзгереді. Дарвин айтқандай: "Ең мықтылар емес, ең жылдам бейімделетіндер аман қалады". Біз жай ғана шешім қабылдай алмаймыз (жоспарсыз. – еск.), 10 жылдан соң, ол салынғаннан кейін су болмай қалса ше?" – деп күдігімен бөлісті қор төрағасы.
Сондай-ақ, оның айтуынша, атом электр станциясы арзанға түспейді.
"Станцияның құны миллиардтаған долларға бағаланады. Бұл атом электр станциясы өзін-өзі ақтауы үшін тариф қандай болуы керек? Мемлекет ретінде мұндай тарифке шамамыз келе ме? Барлығымыз электр энергиясын пайдаланамыз, ұялы телефонымызды зарядтаймыз, интернетке кіреміз, теледидар көреміз. Ал ертең атом электр станциясын салатын болсақ, онда электр энергиясының құны қанша болады? Мұнда барлық факторларды ескеру қажет. Біз бұл қымбат рахатқа дайынбыз ба, соны өзіміз түсінуіміз керек?" - деді Жақыпов.
Соған қарамастан қор басшысы елімізде электр қуатының тапшылығы бар екенін, бұл үшін бірдеңе істеу керектігін мойындады.
587 рет оқылды
_140_110.jpg)
