09 мау, 2023 сағат 13:38

Microsoft тарапынан Қазақстанға үлкен қызығушылық бар – министр

Фото: primeminister.kz

Ұлттық экономика министрі Әлібек Қуантыров Microsoft компаниясымен арадағы келісімшарт туралы айтты, деп хабарлайды Sputnik Қазақстан.

"Оларда (Microsoft – ред.) үлкен қызығушылық бар. Компаия өкілдері форумға арнайы келді. Біздегі нарықтың әлеуетін көргісі келіп отыр. Әрине олар цифровизация министрлігімен және Бағдат Мусиннің өзімен кездесу өткізіп жатыр", - деді Қуантыров Астана халықаралық форумында.

Министрдің айтуынша, жақында өткен инвестициялық форумда ынтымақтастық мәселелері талқыланды. Шара АҚШ-тың сауда палатасы және Қазақстанның сауда министрлігінің ұйымдастыруымен өтті.

"Оларда қызығушылық болмаса, келмейтін еді. Біз өз тарапымыздан мұнай-газ саласы мен пайдалы қазбалар саласына ақша салып жатқан америкалық компаниялармен ғана емес, машина жасау, IT-индустрия мен инфрақұрылымды дамыту саласында әріптестік байланыстарын да орнатуға мүдделі екенімізді жеткіздік", - деп атап көрсетті Қуантыров.

Айта кетейік, кеше Астанада Chevron, Exxon Mobil, General Electrics, Apple, Google, Microsoft, EPAM Systems, Boeing мен Honeywell компанияларының басшылары қатысқан инвестициялық форум өтті.