Фото: Sputnik Қазақстан
Франция президенті Эмманюэль Макрон қазақ мектептерінде француз тілін оқытуды ұсынды. Бұл туралы ол Ақордада Мемлекет басшысы Қасым-Жомарт Тоқаевпен өткен кеңейтілген кездесуде айтты, деп хабарлайды Sputnik Қазақстан.
"Бізге француз тілін оқыту қазақ мектептеріне қайта оралғаны өте маңызды. Қазіргі жағдайды өзгертуге бар күш-жігерімізді салуға дайынбыз. Мен біздің білім беру ұйымдары арасында қол қойылған үкіметаралық келісімге зор үміт артамын", - деді Макрон кеңейтілген кездесуде.
Франция президенті 2024 жылғы қыркүйектен бастап француз-қазақ университеті жұмыс істейтінін атап өтті.
"Студенттер арасындағы байланыстың дамығаны, студенттерімізге арналған стипендиялардың болғаны өте маңызды. Сондай-ақ мен Парижде сіздің еліңіздің мәдени мұрасына арналған көрмені өткізу туралы бастамаңызды қолдаймын. Гиме музейінің төрағасы бүгін менімен бірге келді, қазір біз келесі жылы өткізу мүмкіндігін талқылаймыз", - деді Макрон.
Айта кетейік, бүгін, 1 қарашада Франция президенті Эмманюэль Макрон Қазақстанға ресми сапармен келді. Макронның сапары бір күнге созылады.
650 рет оқылды
