31 жел, 2024 сағат 16:42

Мәдениет саласындағы мемлекеттік стипендия иегерлері белгілі болды

фото: Президенттің баспасөз қызметі

Қазақстан президенті Қасым-Жомарт Тоқаев 2024 жылы мәдениет саласындағы мемлекеттік стипендияны беру туралы өкімге қол қойды, деп хабарлайды Ult.kz Ақорданың ресми сайтына сілтеме жасап.

Осы жылы мәдениет саласындағы мемлекеттік стипендияға 70-тен астам әдебиет және өнер қайраткері ие болды. Олардың қатарында жазушылар Дидар Амантай, Әлібек Асқар, Төлен Әбдікұлы, Ақұштап Бақтыгереева, Смағұл Елубай, Жүрсін Ерман, Алтыншаш Жағанова, Бауыржан Жақып, Мырзатай Жолдасбеков, Дулат Исабеков, Бексұлтан Нұржекеев, Қойшығара Салғараұлы, Олжас Сүлейменов, Серік Тұрғынбекұлы және тағы басқа танымал тұлғалар бар.

Ал өнер қайраткерлерінің ішінде мемлекеттік стипендияны Амандос Ақанаев, Асанәлі Әшімов, Самал Еслямова, Ілия Жақанов, Тұңғышбай Жаманқұлов, Жандарбек Мәлібекұлы, Нұрғали Нүсіпжан, Бибігүл Төлегенова мен Айгүл Үлкенбаева иеленді.

Мемлекеттік стипендия иегерлерінің толық тізімін осы сілтемеден көруге болады.

Айта кетейік, бұрын бұл стипендия экс-президент Нұрсұлтан Назарбаевтың есімімен аталды. Ал Конституцияға енгізілген өзгерістерден кейін атын алып тастады. Бірақ мемлекеттік мәртебесі мен тағайындау тәртібі қалды. Мемлекеттік стипендияның қазіргі көлемі 55 АЕК-ті (2025 жылы 216 260 теңге) құрайды.