Иорданияда премьер-министр Бишер әл-Хасауна басқаратын үкіметтің жаңа құрамы бекітілді, деп хабарлайды "Ұлт ақпарат" PETRA агенттігіне сілтеме жасап.
Дүйсенбі күні Корольдің бұйрығымен Башир әл Хасауна премьер-министр мен қорғаныс министрі қызметіне тағайындалды. Жаңартылған министрлер кабинеті Әл Хусейния сарайында Король ІІ Абдалланың алдында ант берді.
Ал коронавирусқа шалдыққан жаңа үкіметтің мүшесі – Махмут Харабшех карантиннен кейін ант береді.
Салтанатты шараға Корольдің ұлы – мұрагер ханзада Хусейн және Хашимит Корольдігі сотының төрағасы Юсеф Иссави қатысты.
Премьер-министр экономикалық тұрақтылықты арттыру, кедейлік пен жұмыссыздықпен күресудің маңыздылығын атап өтті. Сондай-ақ қызмет көрсету, денсаулық сақтау салаларын жақсартып, пандемияның туристік салаға тигізген зардабын жеңілдетуге уәде берді.
Еске сала кетсек, айдың басында Король Абдалла II бұрынғы премьер-министр Омар Раззазды қызметінен босатып, 27 қыркүйек күні Палатаны таратты. Сондай-ақ үкіметке жалпыға ортақ сайлау ұйымдастыруды тапсырды. Ол 10 қарашада өтеді деп жоспарланған.
