Фото: avtolombardini.ru
Қазақстанның даму банкі бастаған автокредит бағдарламасы жалғаса береді. Бұл туралы Индустрия және инфрақұрылымдық даму вице-министрі Ілияс Оспанов мәлімдеді, деп хабарлайды Sputnik Қазақстан.
4 пайыздық автокредит бағдарламасы ең бірінші Қазақстан даму банкінің бастамасымен қолға алынған болатын.
Вице-министр Ілияс Оспановтың айтуынша, осы бағдарламаға 82 миллиард теңге бөлінген. Барлық ақша игерілді. Қазіргі кезде револьверлік жүйе, яғни берілген автокредиттердің төлемдері есебінен қайта несие рәсімделіп жатыр.
"Жаңағы 82 миллиард теңге 2015 жылы Қазақстанның даму банкі арқылы бөлінген болатын. Ол бағдарлама істеп тұр. Оған қатысты наразылықтар бар. Оны да білеміз. Автобус мәселесін шешкеннен кейін сонымен қосымша айналысамыз", - деді Оспанов арнайы брифингте.
Оның айтуынша, Қазақстанның даму банкі бастаған автокредит бағдарламасына өзгеріс енгізілуі мүмкін. Себебі бүгінде Ұлттық банктің базалық мөлшерлемесі жоғары, ал кредиттің проценті тым төмен.
Қазақстанда тағы бір автокредит бағдарламасына өнеркәсіпті дамыту қоры жауапты. Автокредит порталын да осы мекеме іске қосқан. Бұл бағдарламаның ақшасына автобустарға кредит беріледі.
Айта кетері, бүгін Индустрия және инфрақұрылымдық даму министрі Марат Қарабаев жеңілдетілген автокредит бағдарламасының тоқтатылатынын мәлімдеді. Оның айтуынша, енді барлық ақша автобустарды жаңартуға жұмсалады. Себебі халық қоғамдық көлікті жиі пайдаланады.
553 рет оқылды
_140_110.jpg)
