Фото: МГ
16 жасар мектеп оқушысының қолынан қаза тапқан ананың денесін бүгін, 4 желтоқсан күні, туған жері — Ақтөбе облысының Алге ауданында жерледі. Әйел 41 жаста болған. Сонымен қатар, зардап шеккен әжесі де бар. 2 желтоқсан түнінде ол көп пышақ жарақаттарымен ауруханаға жеткізілген болатын. Әжейдің жағдайы мүшкіл, деп хабарлайды Ult.kz жергілікті Мой город басылымына сілтеме жасап.
Қазіргі уақытта 71 жастағы кейуана Ақтөбедегі №1 қалалық көпсалалы ауруханада ем қабылдауда.
"Пациент 01:40-та қабылданды. Күйі ауыр болды. Оған травматикалық шок және геморрагиялық шок диагнозы қойылды, мойны, жамбасы, иығы, білегі мен қолында көптеп кесілген және тілгіленген жарақаттар, сыртқы қан кету, қабырғалары сынып, төс қуысының жабық жарақаты бар еді. Жәбірленуші реанимацияға жатқызылды, жаралары тігілді, қазір травматология бөлімінде емделуде, — деді аурухананың бас дәрігері Қадырбек Иманбаев.
Әжесі сөйлеуге қабілетсіз, жақсы ести алмайды. Дәрігерлер келесі аптада оны амбулаторлық емге шығаруы мүмкін. Отбасынан оған есту аппаратын әкелуді сұрады, бірақ пәтер әлі мөрленгендіктен әзірше есту аппараты жоқ.
Белгілі болғандай, қанды қылмыс орын алған үй қала орталығында орналасқан. Көршілердің айтуынша, отбасы толық, тыныш өмір сүрген, үш баланы тәрбиелеген. Қамауға алынған жасөспірім — үйдің ең үлкені; екінші ұлы кіші. Үлкен ұлдар жекеменшік мектепте оқыған, бес жастағы кіші ұлы даярлық тобына барған. Ата-аналары жұмыс істеген. Балалар тәрбиелі, әрдайым әжелеріне көмектескен және сенбіліктерге қатысқан.
"Біз бәріміз абдырап қалдық. Мұндай нәрсе қалай болатынын түсінбей отырмыз. Полиция мен жедел жәрдемге көршілер хабарлады, олар айқай-шуды естіп, бірінші болып әрекет етті. Бұл отбасының пәтері 4-қабатта орналасқан. Қазір онда ешкім жоқ. Пәтер мөрленген, — деді көрші.
Еске салайық, қылмыс 2 желтоқсан түнінде Ақтөбедегі пәтерлердің бірінде болған. Полиция қаза болған әйелдің зорлық-зомбылық белгілерімен қайтыс болғанын анықтады. Сол пәтерден әжесі пышақ жарақатымен ауруханаға жеткізілді. Қылмысқа күдікті ретінде 16 жасар жасөспірім ұсталды — ол өз кінәсін мойындап, уақытша тергеу изоляторында жатыр.
БАҚ-та трагедияның бір себебі ретінде ұялы телефонға байланысты жанжал аталған.
