Бас прокурордың орынбасары Ерлік Кененбаев ұсталғандар өз туыстарына қайда екенін айтуға құқығы бар екенін мәлімдеді, деп хабарлайды Sputnik Қазақстан.
Мәжілісте адам құқығын қорғау туралы дөңгелек үстелде депутат Снежанна Имашева көп адам ұсталған жақындарынан еш хабар ала алмайтынына шағымданатынын айтты.
Бас прокурордың орынбасары Ерлік Кененбаевтың айтуынша, прокуратура органдарына осыған қатысты 258 арыз-шағым түскен.
"Әр шағымды мұқият тексереміз. Заң бойынша егер адам ұсталса, ол өз туыстарына хабар беруге құқылы. Сондай-ақ оған адвокат беріледі. Жай ғана қамап тастау деген болмайды. Бұл жайлы ақпаратты асыра сілтеп жіберген. Тергеу органдары әр ұсталған азамат бойынша адвокаттың қатысуымен қажетті шаралар жүргізеді, оған туысқандарына айту құқығы беріледі", - деді Кененбаев.
Айтуынша, террорлық актілерге қатысқандардың дені қорғаушысы ретінде өз туыстарын таңдайды. Бірақ прокуратура әр жағдайда жеке-дара тексереді.
Кененбаев 90-нан астам адам қамаудан босатылғанын, ауырлататын мән-жай болмағандықтан көбінің бұлтартпау шарасы өзгертілгенін еске салды. Бірақ олар қылмыстық жауапкершіліктен құтылмайды.
1130 рет оқылды
