Sýret: Glýbokoe jáne Shemonaiha aýdandary ákimdikteri
Shyǵys Qazaqstan oblysynyń barlyq 11 aýdany "jeke ýaqytqa" kóshti, - dep habarlaidy Ult.kz Tengrinews.kz-ke silteme jasap.
13 naýryzdan bastap Shemonaiha jáne Glýbokoe aýdandaryndaǵy memlekettik mekemeler, kásiporyndar men áleýmettik qyzmetter qyzmetkerleri saǵat 8:00-de jumysqa kelip, 17:30-da aiaqtaidy. Túski úzilis ýaqyty 12:00-13:30 aralyǵynda belgilengen.
Bul ózgerister mektepter, balabaqshalar jáne meditsinalyq uiymdarǵa áser etpeidi, óitkeni olar burynnan osyǵan uqsas jumys kestesimen qyzmet etip kelgen.
Shemonaiha aýdany ákimdiginiń málimetinshe, jańa jumys ýaqyty eńbek protsesin ońtailandyrý jáne aýdandar arasyndaǵy ózara bailanysty jaqsartý maqsatynda engizilgen. Sonymen qatar, ózgerister aimaqtyń tabiǵi erekshelikterine – erte tań atyp, kúnniń erte batýyna bailanysty qabyldanǵan.
"Jańa jumys tártibi kúndizgi ýaqytty barynsha tiimdi paidalanýǵa múmkindik berip, eńbek ónimdiligin arttyrýǵa jáne turǵyndardyń ómir súrý sapasyn jaqsartýǵa yqpal etedi", – dedi aýdan ákimi Didar Keńesbaev.
Glýbokoe aýdanynda jergilikti turǵyndarmen kezdesý ótkizilip, jańa jumys kestesi talqylandy.
"Qyzmetkerlerdiń otbasyna kóbirek ýaqyt bólýine jaǵdai jasaý – basty maqsatymyz. Biz halyqpen aqyldasyp, mundai jumys kestesi eńbek jáne turmys jaǵdaiyn jaqsartatynyna senimdimiz", – dedi aýdan ákimi Eldar Týmashinov.
Jergilikti turǵyndar da bul bastamany qoldady.
"Keshki ýaqytta bos ýaqyttyń kóbeiýi – otbasyǵa kóńil bólýge, úi sharýasyna kóbirek ýaqyt bólýge múmkindik beredi", – deidi Glýbokoe aýdanynyń turǵyny Roza Adilbaeva.
Aita keteiik, 29 aqpannan 1 naýryzǵa qaraǵan túni Qazaqstan biryńǵai ýaqyt beldeýine ótti. Alaida 7 maýsymda ýaqytty qaita ózgertýge qatysty petitsiia bastalyp, 50 myńnan astam qol jinalǵanymen, ol qabyldanbady.
2025 jyldyń qańtarynan bastap Shyǵys Qazaqstan oblysynyń birneshe aýdany jańa jumys ýaqytyna kóshti.
5 qańtardan bastap Katonqaraǵai aýdanynyń 17 aýyly, 24 aqpanda – Marqakól men Úlken Naryn aýdandary, 5 naýryzda – Zaisan, Kúrshim, Tarbaǵatai jáne Samar aýdandary, 12 naýryzda – Altai men Ulan aýdandary jańa kestemen jumys istei bastady. Bul aýdandarda jumys kúni 08:00-de bastalyp, 17:30-da aiaqtalady. Túski úzilis – 12:00-13:30 aralyǵynda belgilengen.
