HHI ǵasyrdyń ortasyna qarai Qazaqstan jastarynyń úshten ekisi qalalarda turady jáne uldar sany qyzdarǵa qaraǵanda sál joǵary bolady. Sarapshylardyń mundai boljamyn «Eńbek resýrstaryn damytý ortalyǵy» AQ keltirip otyr, dep habarlaidy "Ult aqparat".
Eńbek resýrstaryn damytý ortalyǵynyń demografiialyq boljamyna sáikes, 2030 jylǵa qarai Qazaqstanda halyq sany 11,8% ósedi (2019 jylmen salystyrǵanda) jáne shamamen 20 mln 692 myń adamdy quraidy.
«Bul rette, shamamen 12,7 mln adam (61,2%) qalalyq jerdiń turǵyndary bolady. Al aýyl turǵyndarynyń sany 8 mln-nan asady (38,8%).
Sondai-aq, demografiialyq kórsetkishter serpininiń aǵymdaǵy deńgeiin saqtai otyryp, 2050 jylǵa qarai halyqtyń boljamdy sany shamamen 25,4 mln adamdy quraidy. Bul, 2030 jylǵy deńgeiden 22,7% jáne 2019 jylǵy kórsetkishten 34,3% artyq. Onyń ishinde 16,7 mln adam (65,7%) qalalarda, al 8,7 mln adam (34,3%) aýyldyq jerlerde turatyn bolady», - delingen Eńbek resýrstaryn damytý ortalyǵynyń aqparatynda.
«2030 jylǵa qarai halyqtyń 27,4%, al 2050 jylǵa qarai 36% astamy respýblikalyq mańyzy bar Nur-Sultan, Almaty jáne Shymkent qalalarynda turatyn bolady. Bizdiń boljamymyz boiynsha, óńirlerge keletin bolsaq, 10 jyldan keiin Almaty jáne Túrkistan oblystarynda 2 mln adamnan turady. Al Qaraǵandy, Shyǵys Qazaqstan jáne Jambyl oblystarynda 1 mln-nan astam turǵyn bolady. 2050 jylǵa qarai Aqtóbe, Atyraý, Mańǵystaý jáne Qyzylorda oblystary da million turǵyny bar óńirlerge ainalady», – dep bólisti ERDO Boljamdaý departamentiniń direktory Dmitrii Shýmekov.
Sondai-aq, halyqtyń ortasha jasy da artatyny atap ótilgen. 2019 jyly ortasha jas 31,4 jasty qurasa (erler úshin 29,7 jas, áielder úshin 32,9 jas), 2030 jylǵa qarai bul kórsetkish 32,7 jasty (erler úshin 30,9 jasty jáne áielder úshin 34,4 jasty) quraityn bolady, al 2050 jylǵa qarai ortasha jas 32,4 jasqa (erler úshin - 30,8 jas jáne áielder úshin - 34,1 jas) teńeledi.
«Ólim-jitimdi, týýdy jáne kóshi-qondy ótken jyldar deńgeiinde saqtai otyryp, 2030 jylǵa qarai 14-29 jas aralyǵyndaǵy jastar sany ótken jylmen salystyrǵanda 26% ósedi jáne 4,4 mln adamdy quraidy dep boljap otyrmyz. Al 2050 jylǵa qarai bul kórsetkish shamamen 5,1 mln-dy quraidy», – dep atap ótti sarapshy.
Boljamdarǵa sáikes, Túrkistan oblysy 2030 jyly jas turǵyndar boiynsha kóshbasshy bolady: atalǵan ýaqytqa qarai osy óńirdegi jastardyń sany 516 myń adamdy quraidy da, úlesi 24,3% deiin ósedi. Almaty oblysy uldar men qyzdardyń 488 myńkórsetkishimen - ekinshi oryndy, al Almaty qalasy jastardyń 479 myń kórsetkishimen úshinshi orynda bolady.
Sonymen birge, sarapshylar 21 ǵasyrdyń ortasyna qarai Qazaqstan jastarynyń úshten ekisi qalalarda turady jáne uldar sany qyzdar sanynan sál asady dep sanaidy.
