فوتو: NUR.KZ/ۆلاديمير ترەتياكوۆ
تٷركٸستاندا مەديتسينالىق كٶمەك كٶرسەتۋگە بارعان فەلدشەر سوققىعا جىعىلدى, دەپ حابارلايدى Ult.kz كتك ارناسىنا سٸلتەمە جاساپ.
تٷسٸك تاستاۋ قاۋپٸمەن شاقىرتقان كەلٸنشەكتٸ كٶرۋگە بارعان 26 جاستاعى قۇدىرەت مٷتەلٸپوۆتٸ پاتسيەنتتٸڭ كٷيەۋٸ ۇرىپ تاستاعان. اۋىر سوققى العان جەدەل جەردەم قىزمەتكەرٸ ميى شايقالىپ, قازٸر اۋرۋحانادا جاتىر. جانجالدىڭ نەدەن شىققانىن كتك تٸلشٸسٸ بٸلٸپ قايتتى.
جەدەل جەردەم فەلدشەرٸ قۇدٸرەت مٷتەلٸپوۆكە كەزەكتٸ شاقىرتۋ جٷكتٸ كەلٸنشەكتەن تٷسەدٸ. جانىنا پراكتيكانت قىزدى ەرتكەن فەلدشەر سوقىر ٸشەكتەن كٷدٸكتەنٸپ, اياعى اۋىر كەلٸنشەكتٸڭ ٸشٸن ۇستاپ تەكسەرەدٸ. بٸراق مۇنىسى جانىندا تۇرعان كٷيەۋٸنە ۇناماپتى. كەلٸنشەگٸنە بٶتەن ەركەكتٸڭ قولى تيگەنٸنە شامدانعان ازامات مەديتسينا قىزمەتكەرٸن, ەي-شەي جوق, ساباپ تاستاعان.
جانەل قۋانىشبەك, پراكتيكانت:
"الدىمەن بەتٸنەن جۇدىرىقپەن ۇردى, وڭ جاق بەتٸنەن ۇردى. ۇرعان كەزدە باسى قابىرعاعا سوعىلىپ, وتىرىپ قالدى. اياعىمەن بار كٷشٸمەن بەتٸنەن تەپتٸ. مەڭ-زەڭ بولدى. كەيٸن اياعىمەن ٷشٸنشٸ رەت تەپتٸ. سول كەزدە يىعىنا تيدٸ. يىعىنا تيگەننەن كەيٸن, اناسى ارتىنان قۇشاقتاپ اجىراتىپ الدى".
كٶمەكتەسەم دەپ بارىپ, تاياق جەپ كەتكەن فەلدشەرگە جەدەل جەردەم شاقىرتىلىپ, ول اۋرۋحانادان بٸر-اق شىقتى. باسىنان اۋىر جاراقات الىپ تراۆماتولوگييا بٶلٸمٸندە جاتقان 26 جاستاعى جٸگٸت ۋاقىتشا ەسٸن جوعالتىپتى. «كەشەگٸ كٷن مٷلدەم ەسٸمدە جوق» دەگەن ول, سٶيلەۋگە دە قۇلىقسىز. دەرٸگەرلەر قۇدٸرەت مٷتەلٸپوۆ ٶزٸنە كەلۋ ٷشٸن ەلٸ ەكٸ اپتاداي ەمدەلۋٸ كەرەك دەپ وتىر.
بەكزات بەردەنوۆ, تٷركٸستان ورتالىق اۋرۋحاناسىنىڭ باس دەرٸگەرٸ:
"تيٸستٸ دياگنوستيكا زەرتتەۋٸ جٷرگٸزٸلٸپ, جابىق باس جاراقاتى, ميىنىڭ شايقالۋى, كٶزٸنٸڭ جۇمساق تٸندەرٸ زاقىمدانعان, گەماتوما دياگنوزىمەن تراۆماتولوگييا بٶلٸمشەسٸنە جاتقىزىلدى. قازٸر ناۋقاستىڭ دەنساۋلىعى ورتاشا اۋىر. تيٸستٸ مامانداردىڭ كەڭەسٸ تاعايىندالدى".
قىزمەتكەرٸ سوققىعا جىعىلعان تٷركٸستان وبلىستىق جەدەل جەردەم ستانساسى باسشىلىعى فەلدشەر اياعىنان تٸك تۇرىپ كەتكەنشە, جۇمىس ورنى ساقتالادى دەيدٸ. سونداي-اق ولاردىڭ ايتۋىنشا, جۇدىرىعى جۋان سوتقار مەن جەبٸرلەنۋشٸنٸڭ تۋىستارى ٶزارا كەلٸسٸمگە كەلٸپ, كەشٸرٸم بەردٸ دەپ وتىر.
نۇرمۇحان ابدۋللا, تٷركٸستان وبلىسى جەدەل جەردەم ستانتسيياسىنىڭ زاڭگەرٸ:
"بٸزدٸڭ قىزمەتكەر كەشٸرٸم بەرگەن. قوس تاراپ سٶيلەسٸپ, ول كٸسٸگە كەشٸرٸم بەرگەن. ەشقانداي ارىز بەرٸلمەگەن. پوليتسييا قىزمەتٸ شاقىرتۋ الا سالا, نەگٸزٸ, تٸركەۋ كەرەك. بٸزدەن جەدەل جەردەم باردى. بٸز ەڭبەك ينسپەكتسيياسىنا جازىپ قويدىق, اۋرۋحانادان انىقتاماسىن الامىز, دەنساۋلىعى جايىندا, ونى دا ەڭبەك ينسپەكتسيياسىنا جولدايمىز".
كەشە بولعان وقىس وقيعا جايلى تٷركٸستان وبلىسى پوليتسييا دەپارتامەنتٸ ەشقانداي تٷسٸنٸكتەمە بەرە المايدى. جۋان جۇدىرىقتى تۇرعىن تۋرالى دا اقپارات جوق. ەم كٶرسەتەم دەپ سوققىعا جىعىلعان فەلدشەر ەزٸرشە تٷركٸستان اۋرۋحاناسىندا ەمدەلەدٸ. تٷسٸنٸكتەمە الۋ ٷشٸن ەزٸرگە پوليتسەيلەر مۇندا دا باس سۇققان جوق.
