Фото: Pexels.com
Қазақстан Ұлттық банкі 2025 жылдың 4 желтоқсанында валюталық нарыққа қатысты ақпараттық хабарлама таратып, соңғы уақытта АҚШ долларына шаққандағы теңге бағамының айтарлықтай нығаюының себептерін түсіндірді, деп хабарлайды Ult.kz.
Қаржы реттеушісінің дерегінше, қазан айынан бері теңге бір доллар үшін 499–500 теңге аралығында саудаланып, шамамен 9%-ға күшейген. Бұл үрдіс сыртқы нарықтағы қолайлы ахуал мен елдегі макроэкономикалық саясаттың тұрақтылығымен байланысты.
Ұлттық банк мұнайдың әлемдік бағасы барреліне 60 доллардан жоғары деңгейде сақталып отырғанын атап өтті. Сонымен қатар АҚШ Федералды резерв жүйесінің мөлшерлемені төмендету туралы шешімдері жаһандық доллар индексінің 8,3%-ға әлсіреуіне, ал дамушы нарықтар валюталарының 8,3%-ға нығаюына ықпал еткен. Осы факторлар Қазақстан активтеріне халықаралық инвесторлардың қызығушылығын арттырды.
Бұған қоса Үкімет, Ұлттық банк және Қаржы нарығын реттеу агенттігі іске асырып жатқан 2026–2028 жылдарға арналған макроэкономиканы тұрақтандыру және халық әл-ауқатын арттыру жөніндегі бірлескен іс-қимыл бағдарламасы теңгенің тұрақтылығын күшейте түсті. Бағдарлама сұраныс пен ұсыныс теңгерімін қалпына келтіруге, бюджет шығыстарының тиімділігін арттыруға, инфляцияны төмендетуге және экономикалық өсімге жағдай жасауға бағытталған.
«Ақша-кредит саясатының дәйектілігі нарық қатысушыларының сенімін арттырды. Қалыпты қатаң саясат инфляциялық күтулердің төмендеуіне және теңгемен құралдардың нақты кірістілігінің өсуіне әкелді. Бұл отандық активтердің, соның ішінде бейрезиденттер үшін, тартымдылығын күшейтті», — деп атап өтті Ұлттық банк.
