Фото ©️ Tengrinews.kz / Тұрар Қазанғапов
Бұрынғы Ұлттық экономика министрі Қуандық Бишімбаевтың әйелінің өліміне қатысты іс тергеуге алынды, деп хабарлайды "Ұлт ақпарат" Астана қаласы полиция департаментінің баспасөз қызметіне сілтеме жасап.
"Елордалық полиция департаменті Астанадағы мейрамханалардың біріндегі әйелдің өліміне қатысты ҚР Қылмыстық кодексінің 99-бабы 1-бөлігі бойынша тиісті тергеу жұмыстарын жүргізіп жатыр" - делінген хабарламада.
Қылмыстық кодекстің бұл бабы "Адам өлтiру, яғни басқа адамды құқыққа қарсы қасақана қазаға ұшырату" деп аталады. Ол бойынша 8 жылдан 15 жылға дейiнгi мерзiмге бас бостандығынан айыру жазасы көзделген.
Кеше, 9 қарашада бірқатар БАҚ Астанадағы мейрамханалардың бірінде экс-министр Қуандық Бишімбаевтың әйелі көз жұмғанын хабарлады. Астана полициясы марқұм соққыға жығылғанын және алған жарақатынан қаза болғанын мәлімдеді. Тәртіп сақшылары күдіктіні сол күні ұстаған, бірақ оның аты-жөні аталмады.
Бүгін, 10 қарашада Ішкі істер министрінің орынбасары Сәкен Сәрсенов осы факті бойынша бұрынғы Ұлттық экономика министрі Қуандық Бишімбаевтың ұсталғанын растады.
Естеріңізге сала кетейік, Қуандық Бишімбаев 2018 жылы жемқорлық қылмысы үшін 10 жылға сотталған болатын. Алайда бір жылдан кейін түрмеден шықты.
Елді дүрліктірген қайғылы оқиғадан кейін 10 қарашада Шымкент соты Бишімбаевтың неге тым тез бостандыққа шыққанын түсіндірді. Олардың ақпаратынша, 2019 жылы Бишімбаев Президент Жарлығымен кешіріліп, жаза мерзімі 4 жылға дейін қысқартылған. Бұдан соң экс-министр шартты түрде мерзімінен бұрын босату туралы өтініш жазған. Сот бұл өтінішті қанағаттандырды.
Бишімбаев 2019 жылы 11 қазанда бостандыққа шықты. Жаза мерзімі 2021 жылы 9 қаңтарда аяқталған.
734 рет оқылды
_140_110.webp)
