Қазақстанның бірінші, әлемнің 20-ракеткасы Елена Рыбакина US Open турнирін жеңіспен бастады, деп хабарлайды "Ұлт ақпарат".
Осы «Үлкен дулыға» жарысының 19-ракеткасы болып тіркелген қазақстандық теннисші бастапқы кездесуін рейтингте 90-сатыдағы Беларусь өкілі Александра Сасновичпен өткізді.
Бірінші партияда қос брейк жасаған Рыбакина қарсыласына дес берген жоқ – 6:2.
Екінші сетте есеп 4:3 болған мезетте қазақстандық теннисші брейк жасай білді. Сосын матчқа доп бергенде, мүмкіндігін жіберген жоқ – 6:3.
Рыбакина 1 сағат 15 минутқа созылған бәсеке барысында 10 эйс жасап, 10 брейк-пойнттың үшеуін пайдаланды. Брейк жасай алмаған қарсыласы 1 эйспен шектелді.
Осылайша отандасымыз екінші айналымда әлемнің 62-ракеткасы, франциялық Каролин Гарсия немесе рейтингте 151-орында тұрған ұлыбританиялық Хэрриет Дарттың біреуімен шеберлік байқаспақ.
1141 рет оқылды
