Фото: ашық дереккөз
Талғат Байсуфинов Қазақстанның ұлттық футбол құрамасының бас бапкері қызметіне тағайындалды. Бұл жөнінде Қазақстан футбол федерациясының баспасөз қызметі ресми түрде хабарлады.
Федерация таратқан ақпаратта Талғат Байсуфиновтың ұлттық құраманың бас бапкері лауазымына келгені айтылған.
Айта кетейік, 2025 жылы Байсуфинов Қазақстан құрамасын уақытша басқарған болатын. Осы кезеңде ұлттық команда 2026 жылғы әлем чемпионатына іріктеу аясында бірқатар ойын өткізді. Қазақстан құрамасы Лихтенштейнді 4:0 есебімен жеңіп, Солтүстік Македония және Бельгия командаларымен 1:1 есебімен тең ойын көрсетті.
Талғат Байсуфинов бұған дейін де ұлттық құраманың бас бапкері қызметін атқарған. Ол бұл міндетті 2016–2017 және 2020–2022 жылдары орындады.
Маманның клубтық деңгейде де тәжірибесі мол. Әр жылдары «Есіл-Боғатырь» (Петропавл), «Ақсу», «Ертіс» (Павлодар), «Ақжайық» (Орал) командаларын басқарды. Сонымен қатар Қазақстанның жастар құрамасымен жұмыс істеген.
Футболшы ретінде Талғат Байсуфинов «Ертіс», «Металлург», «Еңбек», «Екібастұзец», «Жетісу» және «Восток» клубтарында өнер көрсетті.
