«Қазақ стилі» орта салмақта үлкен қауіпке ұқсайды. «Sky Sports Boxing» бүгін Жәнібек Әлімханұлының жеңісінен кейін Twitter-де осылай жазды, деп хабарлайды "Ұлт ақпарат".
Танымал британдық телефраншиза «Sky Sports Boxing»-нің Twitter-аккаунты орта салмақтағы қазақстандық боксшы Жәнібек Әлімханұлының (10-0, 6КО) америкалық Роб Брантпен (26-3, 18КО) жекпе-жегіне баға берді.
«Әлімханұлы Брантты ойсырата жеңді. Роб Брантты алтыншы раундта «отырғызып», сегіз раундтан кейін жекпе-жектен бас тартуға мәжбүр еткен соң, «Қазақ стилі» орта салмақта үлкен қауіпке ұқсайды», – деп келтіреді Sky Sports Boxing жазбасын kazproboxing Instagram-аккаунты.
Бұдан бөлек, vRINGe.com сайты қазақ боксшысының айқасына жоғары баға берді.
«Virgin Hotels, Лас-Вегас, АҚШ. Орташа салмақ лимитінде (72,6 кг-ға дейін) Қазақстаннан келген Жәнібек Әлімханұлы (10-0, 6 KO) бұрынғы әлем чемпионы америкалық Роб Брантты (26-3, 18 KO) оп-оңай жеңіп кетті.
«Қарсыластар біразға дейін бір-бірінің қимылын аңдып жүріп алды. Брэндтің дайындықсыз шабуылы сол жақ бүйірден тиген соққымен аяқталды. Америкалық қарқын мен қашықтықты сезіне алмады: джеб соққылары дұрыс тимеді, шабуылдары да дарымай, керісінше соққының астында қалды.
Бранттың жаттықтырушысы Брайан Макинтайр Бранттан жекпе-жекті күшейтіп, қашықтықты қысқартуды, бірінші нөмірмен жұмыс істеуді талап етті. Алайда ол бәрін керісінше жасады – қарсыласынан қашқақтап, араларын ұзартып алды. Жекпе-жектің бір жақты болғаны сонша, оны жалғастырудың мәні қалмады. Осылайша Қазақстанда орта салмақтағы топ-10 екінші боксшы бар. Біздің құттықтауларымызды қабыл алыңыздар!», - делінген хабарламада.
1023 рет оқылды
