03 шіл, 2024 сағат 13:18

Салық кодексіне өзгерістер енгізілді: Декларация тапсырудан кімдер босатылады

Фото: T.rbc.ru

2023 жылдың 1 қаңтарынан бастап 2024 жылдың 1 қаңтарына дейін қолданылатын Салық кодексіне енгізілген өзгертулерге сәйкес, бірқатар тұлғалар активтері мен міндеттемелері туралы декларацияны тапсырудан босатылды, деп хабарлайды «Ұлт ақпарат» Stan.kz-ке сілтеме жасап.

Осылайша, мемлекеттік органдардың қызметкерлері және олардың жұбайлары болатын резидент еместер, сондай-ақ квазимемлекеттік сектор субъектілерінің қызметкерлері және олардың жұбайлары (егер олар Салық кодексінің 630-бабының 1-тармағы 1-тармақшасында көрсетілген тұлғаларға жатпаса) 2023 және 2024 жылдарға арналған активтері мен міндеттемелері туралы декларацияны ұсынудан босатылады.

Оларға мыналар кіреді:

жауапты мемлекеттік лауазымды атқаратын тұлғалар және олардың жұбайлары;
мемлекеттік функцияларды орындауға уәкілеттік берілген адамдар және олардың жұбайлары;
мемлекеттік функцияларды орындауға уәкілеттік берілген адамдарға теңестірілген адамдар және олардың жұбайлары;"Қазақстан Республикасындағы сайлау туралы" Конституциялық заңға және "Сыбайлас жемқорлыққа қарсы іс-қимыл туралы", "Қазақстан Республикасындағы банктер және банк қызметі туралы", "Сақтандыру қызметі туралы", "Бағалы қағаздар нарығы туралы" заңдарға сәйкес декларацияны беруге жауапты адамдар.

Сонымен қатар түзетулерге сәйкес резидент еместер, коммерциялық емес ұйымдардың құрылтайшылары (қатысушылары) және акционерлері кіреді. Олар:

жоғарыда көрсетілген адамдарды қоспағанда, мемлекеттік органдардың қызметкерлері және олардың жұбайлары, сондай-ақ квазимемлекеттік сектор субъектілерінің қызметкерлері және олардың жұбайлары;
заңды тұлғалардың басшылары, құрылтайшылары (қатысушылары) және олардың жұбайлары, дара кәсіпкерлер және олардың жұбайлары.

Кірістер мен мүліктер туралы декларация жыл сайын активтер мен міндеттемелер туралы декларация табыс етілген жылдан кейінгі жылдан бастап есепті салық кезеңінің 31 желтоқсанындағы жағдай бойынша табыс етіледі.

"Салық кодексін қолданысқа енгізу туралы" Заңның 45-1-бабының 2 және 3-тармақшаларына және 45-3-бабына өзгерістер енгізілді. Ол 13 шілдеден бастап қолданысқа енгізіледі.

Айта кетейік, бұған дейін енді Қазақстанда шетелдік онлайн дүкендерден тапсырыс бергендер үшін қосымша салық енгізілетіні туралы жазған едік.