Бүгін облыс орталығы Талдықорғандағы Достық үйінде Қазақстан Республикасы Тәуелсіздігінің 25 жылдығына арналған «Тәуелсіздік тұғыры – қоғамдық келісім» атты Қоғамдық келісім кеңестерінің республикалық форумына арналған дөңгелек стол форматында кездесу өтті. Бұл туралы Алматы облысы әкімдігінің ресми сайты хабарлады.
Оған ҚР Парламенті мәжілісінің депутаттары Бақытбек Смағұл мен Юрий Тимощенко, сондай-ақ республикамыздың 16 өңірінен Қоғамдық келісім кеңестерінің мүшелері қатысты. Шараға Қазақстан халқы Ассамблеясы Төрағасының орынбасары Ералы Тоғжанов төрағалық етті. Жиында алғаш болып Қазақстан халқы Ассамблеясы Алматы облыстық хатшылығының жетекшісі Ғабит Тұрсынбай сөз алып, Алматы облысында қоғамдық келісім мен бірлікті нығайту жолында атқарылып жатқан жұмыстар ретіне тоқталды.
Осыдан кейін, әр өңірден келген ҚХА өкілдері еліміздің әр облысында қоғамдық келісімді орнатудағы үздік тәжірибелерімен бөлісіп, жергілікті азаматтардың өзекті мәселелерін шешуге бағытталған ұсыныстарын білдірді.
Форумда өз ойымен бөлісіп, тұщымды пікірін ортаға салған ҚР Парламенті Мәжілісінің депутаты Бақытбек Смағұл өз сөзінде: Мемлекетіміздің 25 жылдағы өсіп-өркендеп, дамуына, халықтың сеніміне ие болып, тыныштық пен берекенің ұйытқыса болу жолында Қазақстан халқы Ассамблеясының сіңірген еңбегі зор. Соның ішінде қоғамдық келісім кеңестерінің қоғамның тірегі болудағы, сондай-ақ Қазақстанды әлемге бірлігі мен ынтымағы жарасқан мемлекет ретінде таныту тұрғысындағы Елбасымыздың саясатын жүргізудегі маңызы ерекше.
Республикалық форумның өз бастауын киелі Жетісу жерінен бастауын алғандығы және барлық игі істердің Қазақстан халқы Ассамблеясынан бастамасымен қолға алынып жатқандығы қуантады. Медиация, қоғамдық, ақсақалдар, аналар кеңестері, міне осы бастамалардың барлығының түпкі мақсаты – біздің ұлттық құндылықтары ортақ, бірлігі жарасқан бір тұтас ел екенімізді таныту. Сол үшін біздер қай жерде жүрсек те Ассамблеяның тындырымды жұмыстарын айтып жүруге тиіспіз, - деп ойын қорытты.
Бүгінгі басқосуды қорытындылаған Қазақстан халқы Ассамблеясы Төрағасының орынбасары Е.Тоғжанов жиын барысында сөз болған әр өңірде қолға алынған жақсы бастамалардың өзге өңірлерге үлгі болып, әрбір елді-мекенде өз жалғасын табатындығына сенім білдірді.
Осылайша кеңес мүшелеріне қоғамдық тұрақтылық пен келісімді нығайту жолындағы жұмыстарды одан әрі жалғастыруды тапсыра отырып, дөңгелек үстелге қатысушыларды Республикалық форум аясында Қазақстан Республикасының мемлекеттік хатшысы Гүлшара Әбдіхалықованың қатысуымен облыстық әкімдік ғимаратындағы өтетін кездесуге шақырды.
2796 рет оқылды
