2 маусымда онлайн форматта омбудсмен және ұлттық алдын алу тетігі қатысушыларының қатысуымен республикалық референдумға шығарылатын конституциялық түзетулерге байланысты пікірталас өтті.
Кездесуге қатысушылар ұсынылып отырған түзетулер және оларды іске асыру бойынша алдағы заң шығару жұмысы жөнінде пікір алмасты. Естеріңізге сала кетейік, Конституцияға өзгерістер енгізу қолданыстағы заңдарға өзгерістер енгізуге және конституциялық сот, прокуратура және Адам құқықтары жөніндегі уәкіл туралы жаңа үш Конституциялық заңның қабылдануына әкеледі.
Талқылау барысында құқық қорғаушылар алдағы заң шығару процесінің тиімділігін қамтамасыз ету, конституциялық түзетулерді іске асыру үшін әзірленетін заң жобаларын кеңінен талқылау бойынша ұсыныстар айтты. Құқық қорғаушылар жаңа конституциялық тетіктерді іске асыру кезінде мемлекеттік органдар тарапынан өкілеттіктерді асыра пайдалануға жол бермеу үшін заң жобаларын әзірлеушілер назар аударуға тиіс негізгі тұстарды белгіледі.
Кездесуге қатысушылар адам құқықтары мен Заң Үстемдігі саласындағы одан арғы шаралар туралы Үкіметтің қабылданған екінші жоспарына қатысты пікір алмасты. Құқық қорғаушылар азаматтардың конституциялық құқықтары мен бостандықтарын қорғаудың жаңа тетігін күшейтетін әрекеттер алгоритмін ұсынды және оны әзірлеу мен талқылауға қатысуға дайын екендіктерін білдірді.
Айта кетейік, Референдум 2022 жылдың 5 маусымында өтеді.
934 рет оқылды
