Оңтүстік Қазақстан облысында жастар этномәдени бірлестіктердің төрағаларымен кездесті. Шымкент аграрлық колледжі жанындағы «Достық» клубында өткен кездесуде латын әліпбиіне көшу мәселесі сөз болды, деп хабарлайды ҚазАқпарат тілшісі.
«Рухани жаңғыру - заман талабы» тақырыбында өткен жиынға қатысушылар Елбасының «Болашаққа бағдар: рухани жаңғыру» мақаласын талқылап, ой бөлісті. Басқосуда сөз алған Оңтүстік Қазақстан облыстық Қазақстан халқы ассамблеясы төрағасының орынбасары, корей этномәдени бірлестігінің төрайымы Роза Пак латын графикасына көшудің маңыздылығына тоқталды.
«Елбасының бағдарламалық мақаласы - бізге жаңа мүмкіндіктер ашып, мәңгілік ел болуға бастайтын маңызды құжат. Мақалада басым бағыт ретінде көрсетілген латын әліпбиіне көшу - еліміздің алға жылжуына, жаңа заман талабына сай өсіп-өркендеуіне үлес қосары сөзсіз. Жаңа әліпби - заманауи технология тілімен үндес. Сондықтан латын қарпіне көшу - уақыт талабы. Көшбасшы мемлекеттермен иық тіресіп, жастарымыз бәсекеге қабілетті болу үшін уақыт көшінен қалмауы тиіс», - деді Роза Пак.
Жиын барысында облыстық түрік этномәдени бірлестігінің төрағасы Латифша Асанов латын әліпбиіне көшу бастамасы түбі бір түркі дүниесінің мәдени, ғылыми, экономикалық байланысының нығаюына мол мүмкіндік беретінін айтты. Сонымен бірге, өзара ынтымағымызды сақтап, елдің бірлігін нығайтудың маңызына да тоқталды.
Кездесу соңында қонақтар студенттердің сауалдарына жауап беріп, алдағы уақытта жиі жүздесіп тұруға уағдаласты.
1609 рет оқылды
