Жергілікті БАҚ өкілдеріне Сарыағаш ауданына кезекті пресс-тур өткізілді, деп хабарлайды "Ұлт ақпарат".
Ауылдық жерлерде кәсіпкерлікті дамыту - «ОҢТҮСТІК» аймақтық инвестициялық орталығының басым бағыттарының бірі. Аталмыш бағытты дамыту жолында «ОҢТҮСТІК» АИО кәсіпкерлікпен айналысамын деушілерге барынша қолдау көрсетіп келеді.
Аудандар бойынша қаржы орталығынан қолдау тапқан бірнеше жобаларды үлгі ретінде көрсетіп, халыққа кәсіпкерлікпен айналысудың тиімді жақтарын насихаттау мақсатында, аудандық жергілікті телеарнаның тілшілеріне пресс-тур ұйымдастырылуда.
Бүгінде «ОҢТҮСТІК» АИО Сарыағаш ауданы бойынша жалпы сомасы 3,2 млрд теңгені құрайтын 1 265 жобаны қаржыландырған. Жүзеге асырылған жобалар аясында 1 710 жаңа жұмыс орындары ашылған.
БАҚ өкілдері қаржы орталығы арқылы төменгі пайыздық несиемен қаржыландырылған «Сарыағаш жер сыйы» ЖШС-нда болды.
«ОҢТҮСТІК» АИО-нан 15 млн теңге несие алып, жұмысының тиімділігін арттырып отырған серіктестік элиталық көшеттерді отырғызу жəне көбейтумен айналысады. Алған қаржысына өнім сақтау қоймасын салып, кассетаға көшет отырғызу құрылғысы мен кассеталарын сатып алған. Қойманың сыйымдылығы 240 тонна. Көшет отырғызу аппараты күндігіне 3 гектар жерге қажет дәнді егіп үлгереді. Еуропадан әкелінген құрылғының әзірге облыста теңдесі жоқ. Бүгінде «Сарыағаш жер сыйы» серіктестігі осы желіде қызмет жасау үшін 60-тан астам жергілікті тұрғынды жұмыспен қамтып отыр. Қожалықта киви, банан, ананас сияқты субтропикті жемістер сонымен қатар жаңғақ, лимон, жүзімнің өте аз кездесетін сорттары көбейтіліп, көшеттер Алматы, Жамбыл, Қызылорда жəне Ақтөбе сияқты Қазақстанның бірқатар облыстарына жеткізілуде.
Сонымен қатар, журналистер осы күні 2016 жылдың қараша айында «ОҢТҮСТІК» АИО-нан 63,5 млн теңге көлемінде несие алып өз жұмысын бастаған «Сарыағаш-құс» ЖСШ-нда болды. Несиені өте орынды пайдаланған кәсіпкер қаражатқа 46 мың балапан, оларды өсіруге қажетті жабдықтар және витаминдер сатып алған. 165 күнде тауыққа айналған құстар 41-42 мың жұмыртқа беріп отыр. Жұмыртқалар Сарыағаш ауданындағы дүкендерге таратылады. Серіктестікте 15 адам жұмыспен қамтылған.
Кәсіпкер алдағы уақытта құс фермасының өнім көлемін арттыру мақсатында қосымша тағы да аталмыш орталықтан қаржы алуды көздеп отыр. Осылайша, жұмыс көзін молайтып, нарық сұранысын қамтымақ.
1841 рет оқылды
