Бүгін Оңтүстік Қазақстан облысының әкімі Ж.Түймебаев ОҚО Ішкі істер департаментінің базасында болып, ондағы өтіп жатқан республикалық штабтық оқу-жаттығудың барысымен танысты, деп хабарлайды "Ұлт ақпарат".
Облыс әкіміне Ішкі істер органының дайындығы мен қабілеттілік деңгейі және материалдық-техникалық базасы көрсетілді.
Құқық қорғау саласының қызметкерлерімен тілдескен аймақ басшысы ішкі істер органының жұмысы заманауи техникамен қамтамасыз етілгенінде емес, мамандардың кәсібилігімен анықталатынын атап өтті.
Айта кетейік, оқу-жаттығу шеңберінде дағдарыс жағдайы туындаған орындарға қысқы мезгілде операцияларды өткізу кезіндегі әрекеттерге құқыққорғау органдары күштерін жөнелту мәселелері пысықталады.
Мәселен, оқу-жаттығу барысында күш пен құралдарды басқаруды ұйымдастыру, мемлекеттік органдарды жедел хабардар ету, ведомстволық байланыс құралдарының және өзара байланысының тұрақты жұмысын қамтамасыз ету, әртүрлі қойылған тапсырмаларды орындаудағы мемлекеттік органдардың өзара байланысы тексеріледі.
Сондай-ақ, оқу-жаттығу барысында шартты түрдегі төтенше жағдай кезіндегі азаматтардың қауіпсіздігін қамтамасыз ету және құқық қорғау органдарының жедел өзара іс-әрекеті пысықталады.
Еске сала кетейік, қараша айының басында Оңтүстік Қазақстан облысында «Қыс-2017» республикалық командалық-штабтық оқу-жаттығуы өткен болатын.
Ол шараға облыстық ішкі істер және төтенше жағдайлар департаменттері, облыстың, қалалар мен аудандардың азаматтық қорғау қызметтері, төтенше жағдай комиссиясы, өңірдегі дислокацияланған Қорғаныс министрлігінің бөлімдері қатысқан еді.
1811 рет оқылды
