Лионель Мессидің «Пари Сен-Жермен» (ПСЖ) француз футбол клубына өтуі жұртты шулатты. Жанкүйерлер Месси бейнеленген клубтың атрибутикасын сатып алу үшін кезекке тұрып жатыр, деп хабарлайды "Ұлт ақпарат" Reuters-ке сілтеме жасап.
Аргентиналық футболшының есімі жазылған клуб футболкалары Париждегі «ПСЖ-ның» дүкенінде сатылып жатыр. Әлеуметтік желі қолданушылары жаңа клубтың аккаунтына миллиондап жазылуда. Ал, «ПСЖ-ның» Месси қатысатын матчтарын көрсету құқығын сатып алу үлкен табыс әкелмек. Осылайша, Лионель Мессидің Парижге келуі ақша ағымына оң ықпал етуде.
«ПСЖ» төрағасы Нассер аль-Хелаифи сәрсенбі күні журналистерге 34 жастағы алты дүркін «Алтын доп» иесінің клубқа әкелетін табысына адамдардың таңғалатынын мәлім етті.
Париждің орталығындағы «ПСЖ» дүкенінде бір жанкүйердің Мессидің суреті бар 165 еуро (194 доллар) тұратын футболканы сатып алу үшін екі сағат кезекте тұрған.
«Мен оны сатып алғым келді. Бұл ПСЖ-ға көп ақша әкелсе, жанкүйерлерге – қуаныш сыйлайды. Бәрі де бақытты болады», - деді 18 жастағы Джонатан Мсиед Reuters-ке.
Спорт маркетингі жөніндегі сарапшы Венсан Шодельдің айтуынша, Amazon (AMZN.O) компаниясы да табысқа кенелмек. Бұл компания осы жылдың маусым айында жоғары француз футбол дивизионының 80% матчын трансляциялау құқығын жеңіп алған.
«Amazon компаниясын лотерея ұтып алды десек болады. Мессидің қатысуымен өтетін осынша матчты аз ақшаға көрсету – үлкен жеңіс. Екінші жеңімпаз - «ПСЖ». Ол әлемнің ірі клубтары арасында өз орнын нығайтпақшы», - деп атап өтті Шодель.
Айта кетейік, өз мансабында тек «Барселонада» ойнаған Месси келісімшартты ұзарту туралы келісімге келе алмағандықтан каталондық клубтан кетуге мәжбүр болған еді. Көп ұзамай оның жаңа клубқа қатысты өз таңдауын жасағаны туралы ақпарат таратылды. 34 жастағы футболшы «Барсамен» 36 турнирде жеңіске жетіп, 672 гол соқты. Месси өткен жылы жазда «Барселонадан» кетпекші болды, бірақ клуб оны жіберген жоқ. Осы жылдың 1 шілдесінде ол бос агент атанды. Сенбі күні Месси клубпен көзіне жас алып қоштасып, жанкүйерлері мен клубтағы әріптестеріне алғыс айтты.
1117 рет оқылды
