Фото:WNG2024
Жарыс Астанадағы «Қазанат» ипподромда өтті.
5-ші Дүниежүзілік Көшпенділер ойындарында Көкпардан өткен жарыста Қазақстан құрамасы АҚШ құрамасын 12:4 есеппен жеңді, деп хабарлайды "Ұлт Ақпарат".
«АҚШ құрамасының ойыны бұрынғыға қарағанда дұрысталып қалған. Кеше көкбөрі ойнаған құрамы бүгін көкпар ойнады. Ертең жартылай финалда Ресей көкпаршыларымен кездесеміз. Тобымызда бес құрама болған соң финалға дейін үш кездесу өткізуіміз керек болды. Ал басты қарсыласымыз Қырғызстан бүгін Түркияны жеңсе финалға шығып тұр», – деді көкпардан ұлттық құрама бас бапкері Абылай Манкеев.
Көкпар бәсекесіне 9 мемлекеттің құрамасы қатысып жатыр. Бұл спорт түрінен барлығы 104 спортшы сынға түседі. Көкпардан бақ сынайтын құрамалар: Қазақстан, АҚШ, Ресей, Өзбекстан, Қырғызстан, Венгрия, Қытай, Моңғолия және Түркия.
Финалдық ойындар 12 қыркүйекте өтеді.
Айта кетейік, бүгін 5-ші Дүниежүзілік Көшпенділер ойындарының үшінші күні өтіп жатыр. 10 қыркүйекте көкпардан бөлек, аударыспақ, жамбы ату, дәстүрлі садақ ату және қазақ күресі мен мас-рестлингтен жарыс болады. Сонымен қатар, көрермендер бес асық пен тоғызқұмалақтан сайыстарды да тамашалай алады.
2242 рет оқылды
