Иордания астанасы Амман қаласында бокстан жастар мен жаөспірімдер арасында Азия чемпионатында Қазақстан құрамасы жалпы командалық есепте үшінші орын алды, деп хабарлайды ҚазАқпарат.
Қазақстандық спортшылар 13 алтын, 14 күміс, 17 қола медаль алды. Нәтижесінде үшінші орынға тұрақтады.
Көш басында тұрған Өзбекстанның 20 алтын, 16 күміс, 7 қола медалі бар. Екінші орынға 15 алтын, 10 күміс, 18 қола медальмен Үндістан жайғасты.
Еске салсақ, жастар арасында Егор Егоров (71 келі), Темірлан Мұқатаев (86 келі), Томирис Мырзақұл (52 келі), Виктория Байдукова (54 келі), Ұлжан Сәрсенбек (57 келі), Бақыт Сейдіш (66 келі), Камила Бажбенова (81 келі) алтыннан алқа тақты.
Ал жасөспірімдерде Айдар Қадырхан (52 келі), Төрехан Сабырхан (57 келі), Ахмет Үсен (63 келі), Санжар-Әли Бегалиев (66 келі), Аружан Жаңабаева (66 келі) және Кұралай Егінбайқызы (80 келі) чемпион атанды.
1616 рет оқылды
