Сауда және интеграция министрі Бақыт Сұлтанов Қазақстан нарығына кіргізіліп жатқан шетелдік тауарлардың сапасы төмен екенін мәлім етті, деп хабарлайды "Ұлт ақпарат".
«Бүгін біз ішкі нарықта шетелдік тауарлардың артып бара жатқанын көріп отырмыз. Олар негізінен сапасы төмен тауарлар. Бұл біздің азаматтарымыздың өмір сүру сапасының деңгейіне де әсер етері сөзсіз. Бүгінгі күрделі проблемалардың бірі – қабылданған 8800-ден астам ұлттық стандарттың жартысы қажетсіз деген оймен бизнесте қолданылмайтыны. Отандық өнімнің қауіпсіздігін қамтамасыз ететін сынақ базасы да жаңғыртуды қажет етеді», - деді министр Үкімет отырысында.
Бақыт Сұлтановтың айтуынша, сыртқы нарықтағы отандық тауардың бәсекеге қабілеттілігі экспорттық қоржынды әртараптандырудың төмендігін көрсетеді.
«Сонымен қатар тауарлар мен қызметтер экспортын шетелде ілгерілету бойынша қалыптасқан инфрақұрылымның жоқтығы мен қойылған кедергілер сыртқы нарықтарға қол жеткізу процесін әлдеқайда қиындатады. Бұл ретте біз сауданың сыртқы және ішкі контурларына ықпал ететін трендтерді де ұмытпауымыз керек. Ішкі нарықта шетелдік бөлшек сауда желілерінің экспансиясы байқалуда. Олардың сөрелерінде көбінесе өз елдерінде шығарылған өнімдер сатылып жатыр», - деді ол.
Айта кетсек, бүгін Үкімет сауданы дамытудың мемлекеттік бағдарламасының 2021-2025 жылдарға арналған тұжырымдамасын бекіткен болатын.
1157 рет оқылды
_140_110.jpg)
