"Қазақстан су шаруашылығының" бұрынғы директоры, өзін-өзі атып өлтірген Өмірбек Жампозовтың ұлына прокурорға шабуыл жасағаны туралы айып тағылған жоқ, деп хабарлайды Қазақстан ІІМ мемлекеттік тіл және ақпарат департаментінің директоры Алмас Сәдубаев.
Бұдан бұрын хабарланғандай, 32 жастағы Асылжан Жампозовқа қатысты прокурорға қарсы күш қолданғаны үшін ҚР ҚК 380-бабы 1-бөлігі бойынша қылмыстық іс қозғалған болатын.
Асылжан бұл жайында әлеуметтік желіден оқып біліпті. Оның айтуынша, әкесінің мәйітіне жақындағысы келгенде, құқық қорғаушылар қолын қайырып ұстап, жібермей қойған. Сонымен бірге, Жампозовтың ұлы бәзбіреулердің қоқан-лоққы жасап жүргенін де айтқан болатын.
ІІМ өкілі өз мәлімдемесінде марқұмның ұлына қысым көрсетіліп жатқанын жоққа шығарды.
"Қазіргі уақытта БАҚ-да биыл 20 шілдеде көпшілікке белгілі жағдайда көз жұмған Жампозов Өмірбек Асықбекұлының баласы — Жампозов Асылжанға құқық қорғау органы тарапынан қысым көрсетілгені туралы айтылып жүр", — деп атап өтті ІІМ өкілі.
Оның сөзіне сүйенсек, Жампозов Асылжан 2017 жылы 20 шілдеде оқиға орнын қарау барысында Целиноград ауданы прокурорының ішінен аяғымен бір тепкен. Сол жерде аудан прокурорын өлтіремін деп те сес көрсетіпті. Жедел тергеу тобы мүшелері мен басқа да ресми өкілдер бұл оқиғаның куәсі болған, деді Сәдубаев.
Сәдубаевтың айтуынша, "жерлеу рәсіміне байланысты Жампозов Асылжанға қатысты сотқа дейінгі шаралар кейінге қалдырылған".
"Іс бойынша Жампозов Асылжанның статусы әлі анықталған жоқ, ешқандай айып та тағылмаған", — дейді ІІМ ресми өкілі.
Қазіргі уақытта сотқа дейінгі тергеу әділ жүруі үшін іс деректерін ҚР ІІМ өндірісіне жіберу мәселесі қаралуда.
3421 рет оқылды
_140_110.webp)
