Футзалдан Чемпиондар лигасының элиталық сатысында қазақстандық «Қайрат» Мальтаның «Люксол Сент-Эндрюс» командасымен кездесті, деп хабарлайды ҚазАқпарат.
Командалар С тобында сынға түседі. Алматы қаласында өтіп жатқан аталған топ ойындарында олардан өзге «Хрудим» (Чехия) және «Бенфика» (Португалия) бақ сынап жатыр.
Кездесу барысында командалар бір-бірінің қақпасынан гол соғатын мүмкіндік іздеді. Дегенмен бірінші кезеңде таблодағы есеп өзгерген жоқ.
Екінші кезеңде «Қайрат» ойын тізгінін өз қолына алуға тырысты. Алайда жанкүйерлер соғылған голды көре алған жоқ.
Кездесу 0:0 есебімен тең аяқталды.
Енді алматылық клуб алдағы ойынын ертең, 24 қарашада «Хрудим» командасына қарсы өткізеді.
Чехиялық клуб бүгін Португалияның «Бенфика» командасымен 3:3 есебімен тең түсті.
Ойындар 22-27 қараша аралығында өтеді. Әрбір топтың жеңімпазы турнирдің бас жүлдесін сарапқа салатын төрт команда қатарына қосылады.
Алматылық клуб турнирдің негізгі сатысында өз тобында үшінші орын алды. Жарыс барысында франциялық «Спортинг Парижді» 3:2 есебімен жеңсе, бельгиялық «Халле-Гооик» және испаниялық «Пальмамен» 2:2 есебімен тең түсті.
2433 рет оқылды
