29 қаз, 2021 сағат 00:36

Футзалдан Чемпиондар лигасы: «Қайрат» екінші мәрте тең түсті

Бүгін футзалдан UEFA Чемпиондар лигасы негізгі сатысында «Қайрат» және «Атырау» екінші ойындарын өткізді, деп хабарлайды ҚазАқпарат.

«Қайрат» Ресейдің «Тюмень» командасымен шеберлік байқасты. Бірінші кезеңнен кейін қазақстандық клуб 1:3 есебімен жеңіліп жатқан еді.

Екінші кезеңде олар таразы басын теңестірді. Бұдан кейін командалардың есепті өзгертетін мүмкіндігі болған еді. Дегенмен қарсыластар 3:3 есебіне қанағат білдірді.

Тағы бір ойында «Атырау» Португалияның «Спортинг» клубына 1:8 есебімен жол берді.

Айта кетсек, «Қайрат» төртінші топта сынға түседі. Қарсыластары - Чехияның «Пльзень», Ресейдің «Тюмень» және Италияның «Пезаро» командалары.

Ал «Атырау» екінші топта Словенияның «Добовец», Португалияның «Спортинг» және Францияның «Аньер Вильнев 92» командалармен бақ сынайды.

Алғашқы ойында «Қайрат» Чехияның «Пльзень» командасымен 3:3 есебімен тең түссе, «Атырау» Словенияның «Добовеціне» 1:2 есебімен жол берді.

Енді 30 қазанда «Қайрат» Италияның «Пезаро», «Атырау» Францияның «Аньер Вильнев 92» командасымен бақ сынайды.