Сербия астанасы Белград қаласында өтіп жатқан бокстан әлем чемпионатында қазақстандық Саматәли Төлтаев екінші жекпе-жегін сәтті өткізді, деп хабарлайды ҚазАқпарат.
Бұл жолы Саматәли (60 келі) колумбиялық Дуван Сулета Мореномен шеберлік байқасты.
Бірінші раундта қарсыластар тең деңгейде жұдырықтасты. Нәтижесінде 3 төреші Cаматәлиге қолдау білдірсе, екеуі колумбиялық спортшының жеңгенін көрсетті.
Екінші раундта да жекпе-жек тартысты өрбіді. Қазақстандық боксшының көбірек соққы жұмсағаны байқалып тұрды. Сол арқылы төрешілер шешімімен Саматәли қарсыласын 4:1 есебімен жеңді.
Үшінші раундта да қазақстандық боксшы сенімді ойын көрсетті. Қорытынды нәтижеде Саматәли жеңіске жетіп, жарыстың келесі сатысына шықты. Енді ол франциялық Софьян Умиамен шеберлік байқасады.
Еске салсақ, алғашқы жекпе-жегінде Саматәли Төлтаев таиландтық Хунатип Пиднучты қапы қалдырған еді.
Сондай-ақ, бүгін Махмуд Сабырхан (54 келі) шотландиялық Мэттью Макхейлдің осал тұсын тапты.
1023 рет оқылды
