Бокстан Белградта өтіп жатқан әлем чемпионатында Қазақстан құрамасының қоржыны күміс жүлдемен толықты. Ел үміт күткен 20 жастағы Махмұд Сабырхан әлемдік сынды екінші орынмен аяқтады, деп хабарлайды "Ұлт ақпарат".
54 келіге дейінгі салмақта сынға түскен Махмұд финалда жапондық Тамоя Цубойдан 0:5 есебімен ұтылды.
Аталған жекпе-жек Махмұд Сабырхан үшін үлкен тәжірибе болғаны анық. Әлем чемпионаты барысында мамандар мен жанкүйерлерден жоғары баға алған қазақ боксшысы финалда жастығы мен тәжірибенің аздығынан қарсыласына жол берді.
Бірінші раундта Махмұд аздаған басымдықпен жеңіске жеткенімен, қалған екі раундта жапондық боксшының соққылары дәл әрі мықтырақ болды.
Бұл - отандасымыз қатысып отырған алғашқы әлем чемпионаты. 20 жасында әлем чемпионатының финалында сынға түскені - Махмұдтың талантты боксшы екенінің дәлелі.
1785 рет оқылды
