22 қараша күні таңертең Ақсай қаласының 10-шағын ауданындағы №19 үйде өрт шықты. Батыс Қазақстан облысының Төтенше жағдайлар департаментінің мәліметінше, төртінші қабаттағы пәтерде жиһаз бен жеке заттар жанған. Өрттің жалпы аумағы 60 шаршы метрді құрады. Құтқарушылар 12 адамды эвакуациялады, олардың жетеуі – балалар.
Әлеуметтік желілерде оқиға орнынан түсірілген қорқынышты кадрлар таралуда. Бейнежазбада төртінші қабаттағы терезеден екі кішкентай баланың секіргені көрінеді. Төменде тұрған ер адамдар оларды арнайы мата арқылы ұстауға тырысқан. Өкінішке қарай, екінші бала құлаған кезде матаның шеті шығып кеткен. Екі бала да ауруханаға жеткізілді. Облыстық денсаулық сақтау басқармасының баспасөз қызметі олардың жағдайы туралы кейінірек ақпарат беретінін хабарлады.
Өрт сағат 9:47-де сөндірілді. Өрттің себептері анықталуда. Ақсай қаласы әкімдігі жағдайды бақылауда ұстап отырғанын және отбасына көмек көрсетілетінін мәлімдеді.
"Қазіргі уақытта 4 және 8 жастағы екі бала мен 43 жастағы әйел жансақтау бөлімінде жатыр. Дәрігерлер олардың жағдайын ауыр деп бағалап отыр. Олар қажетті ем алып жатыр", — деп хабарлады ведомство өкілдері.
Қала әкімдігі оқиғаны қатаң бақылауда ұстап отырғанын және зардап шеккен отбасына тиісті көмек көрсетілетінін атап өтті.
59 рет оқылды
