Бейжіңдегі қысқы Олимпиада ойындарында шаңғыдан ерлер арасындағы спринттен іріктеу жарыстары аяқталды, деп хабарлайды ҚазАқпарат.
Аталған сында ел намысын ерлерден Евгений Величко мен Виталий Пухкало қорғаған болатын. Өкінішке қарай екеуі де ширек финалға шығатын үздік 30 шаңғышының қатарына іліге алған жоқ.
Атап айтсақ, жарыс қорытындысы бойынша Величко 62-орынға, ал Пухкало 66-орынға жайғасты. Осылайша қазақстандық спортшылар спринтте іріктеуден өте алмады.
Жарыстың ережесіне сәйкес, ширек финалға жолдама алу үшін спортшылар алғашқы 30 шаңғышының қатарына енуі керек.
Естеріңізге салайық, осыған дейін әйелдер арасында өткен спринттен іріктеу сайысында аруларымыз үздік 30 спортшының қатарына қосыла алмады.
Айта кетейік, Бейжің қаласындағы 2022 жылғы қысқы Олимпиадада спорттың жеті түрінен 109 медаль жиынтығы сарапқа салынады. Ақ Олимпиадада еліміздің атынан 34 спортшы 85 жолдама бойынша ел намысын қорғап жатыр.
1113 рет оқылды
