Жақында “Қазақстан” ұлттық арнасынан “Әйел сыры” деген бағдарламаны көзiм шалып қалды. Жүргiзушiлер мен шақырылған қонақтар арасында “азаматтық неке” жайлы пiкiрталас жүрiп жатыр екен.
Азаматтық некенi “неке” деп айтудың өзi дұрыс емес деп ойлаймын. “Азаматтық келiсiм” деген жөн болар. Пiкiрталас барысында эфирге хабарласқан жастардың бiразы “азаматтық некенiң” дұрыс еместiгiн, оған қарсы екендiктерiн бiлдiрдi. Бұл, әрине, қуанарлық жағдай. Хабар басында, өзi он жылдан аса уақыт азаматтық келiсiммен тұрмыс құрып, 2 баласы бар екендiгiн, өкiнбейтiнiн айтқан басты кейiпкердiң өзi оның дұрыс еместiгiне көз жеткiзiп ойланып қалды. Иә, түсiнген адамға Алланың алдында некесiз тұрмыс құру зина (ойнас)болып саналады. Екi жас Алланың үйiнде, имамның некенi қиюы арқылы заңды ерлi-зайыпты атануы керек.
Бағдарламаның қонағы, белгiлi әншi Құдайберген Бекiшов азаматтық некеге түк те қарсылығы жоқ екенiн ашық айтты. Халық болып құрметтеп жүрген ағамыздың бұл сөзi жастарға қандай үлгi болмақ? Жүргiзушi Құдайберген ағамызға “Ұлың азаматтық некемен үйленсе қарсы болмайсың ба?” дегенде ғана ағамыз ойланып қалды.
Сондағы ойыма келгенi, осы бiздiң халық алдында жүрген адамдарымыздың денi “алға жылжуымыз керек, дамуымыз керек, бүйтуiмiз керек, сүйтуiмiз керек...” деп асыра сiлтеп жiберген жоқ па екен? Ендi ұлдарымыз “азаматтық некемен” үйленiп алып, бiр жылдан кейiн “мына қыз маған болмайды екен, басқасын алам” дегенге көз жұмуымыз қалды ма? Жетпегенi осы ма едi? Онсыз да елiмiзде жылына 50 мың отбасы ажырасып жатыр емес пе?
Әркiм өзiнiң ойын ашық айтуға құқылы, дегенмен миллиондаған көрерменi бар ұлттық арнамыз талқыланатын тақырыптарға, шақырылатын қонақтарға ерекше мән берсе деймiз. Жастардың санасын улайтын пiкiрлерден аулақ болғанымыз абзал.
Беделхан ЖАНПЕЙIСТЕГI,
Алакөл ауданы,
Үшарал қаласы,
Алматы облысы
"Жас Алаш" газеті
8920 рет оқылды
_140_110.webp)
