Осыдан жарты жыл бұрын құрылған «Азаматтарға арналған үкімет» мемлекеттік корпорациясының құзыреті шеңберінде сервисті жетілдіруге бағытталған қанатқақты жобалар әзірленіп, олар іске асырылды. Бұл азаматтар үшін мемлекеттік қызметтерді алудағы әкімшілік кедергілерді азайтып, рәсімдерді кемітудің нәтижесінде мүмкін болды. Осы жобаларды жүзеге асыру, қызметтерді пайдаланушылардың пікірі бойынша, оң нәтиже берді. Аталған мемлекеттік корпорация енді осы оң нәтижелерді құжат түрінде бекіту үшін орталық мемлекеттік органдардың құқықтық актілеріне өзгерістер енгізуді ұсынуда.
Корпорация жұмысын тиімді ұйымдастыру нәтижесінде сыбайлас жемқорлық көріністерін жедел анықтауға, құқық бұзушылықтарды дер кезінде ашуға қол жеткізіліп отыр. Құрылым аясындағы басты нәтижелердің бірі жерге және жылжымайтын мүлікке қатысты жемқорлықты ашу болып табылады. Жалпы, біз жемқорлыққа қарсы күрес жариялап отырмыз. Осы күреске белсене қатысатындар да, сондай-ақ, тасада қалып қоятындар да болуы әбден ықтимал.
Қазіргі таңда өңірлерде аталған мәселеге қатысты орын алған жағдайды зерделеп, баға беру өте маңызды. Осы орайда бірінші кезекте Ақмола, Алматы, Оңтүстік Қазақстан облыстарындағы Жер кадастры және жылжымайтын мүлікті техникалық бақылау департаменттерін тексеру ұсынылды. Өкінішке қарай, тексеру барысында біздің қаупіміз расталды. Осы облыстарды тексерудің нәтижесінде жүйеде көптеген осал тұстардың бар екені, ал ниеті теріс қызметкерлердің осы олқылықтарды қара бастарының қамы үшін оңтайлы пайдаланып отырғаны анықталды.
Осы үш өңірді тексеру шаралары алдағы уақытта атқарар жұмысымыздың ауқымын кеңейтіп, мұндай тексерулерді басқа да облыстарда жүргізудің қажеттігін көрсетті. Содан, 15 қыркүйектен бастап барлық облыстардағы аталған департаменттерге тексерулер жүргізуді қолға алдық. Осы іс-шара биылғы жылдың соңына дейін жалғаспақ.
Негізінде, мәліметтер базасының әркелкілігіне байланысты жер телімдеріне қатысты қиындықтар бар. Бұл жағдайды шешудің бір ғана жолы мәліметтердің бірыңғай республикалық базасын құру болып табылады. Орталықтандырылған есепке алу жазбаларын беру мен оларды пайдалануды қатаң бақылауға алудың нәтижесінде Ақмола облысында бірқатар кемшіліктердің беті ашылды. Осы облыста жұмыстан босатылған қызметкерлердің мемлекеттік жер кадастры ақпараттық жүйесіне кіруіне шектеу қойылмаған. Шымкентте де өрескел кемшіліктердің беті ашылып, мәселенің анық-қанығына жету ісі тиісті орындарға тапсырылды.
Бір айта кетер жайт, бұл тексерулердің басты мақсаты – саланың түйткілді тұстарын анықтау. Мәселелер мен оның түп тамыры белгілі болғанда ғана кемшіліктерді жоюға мүмкіндік туады. Ал бұл түйткілдерді жүйелі түрде шешу басқа мәселе.
Тексеру кезінде барлық мәселелерді анықтау үшін келешекте тұрақты түрде жұмыс істейтін 8 (7172) 27-23-14 сенім телефоны орнатылды. Осы телефон нөміріне салаға қатысты департаменттердің қызметтерін пайдалану кезінде кездесетін сыбайлас жемқорлық пен басқа да заң бұзушылық фактілері туралы хабарлауға болады.
Біз бұл күресте орын алған жағдайға барынша қатаң баға беруге тырыстық. Қазір мемлекеттiк корпорация орын алған келеңсіз жағдайға байланысты сыбайлас жемқорлыққа қарсы күрес жоспарын бекітті.
Жұмысқа қабылдауда сыбайлас жемқорлық пен тамыр-таныстықтың жолын кесу, кадр мәселесін шешу үдерісіне корпорация қызметкерлерінің ықпал етуіне жол бермеу үшін біз барлық кадр қызметін аутсорсингке беруді жоспарлап отырмыз. Қызметкерлерге де, кандидаттарға да қойылар талаптың нақты өлшемдері жасалды. Қызметкерлерді аттестаттау, жұмысқа қабылдаудағы тестілеу, өндірістік көрсеткіштердің жетістіктері компанияның автоматтандырылған жүйесі арқылы жүргізілетін болады. Бұл жобаны мемлекеттік-жеке әріптестік қағидасы бойынша жүзеге асыру жоспарлануда.
Сыбайлас жемқорлықтың түп тамырына балта шабу үшін бізге әлі көп еңбектенуге тура келеді. Қазірдің өзінде мемлекеттік корпорацияның қазіргі және бұрынғы қызметкерлерінің үстінен 10 қылмыстық іс қозғалды. Олардың көпшілігі 2011-2015 жылдары жіберілген заң бұзушылықтарға байланысты. Алдағы уақытта да тексеру нәтижелері бойынша қандай да бір заң бұзушылықтар анықталып жатса, тиісті ықпал ету шараларын қолданатын боламыз. Біздің қазіргі міндетіміз – корпорацияның барлық қызметінің ашықтығын қамтамасыз ету.
Сыбайлас жемқорлыққа қарсы ашық күрес жүргізе отырып, біз өзімізге қарсы айтылар сын-ескертпелердің болатынын да сезініп отырмыз. Бірақ, біз сындарлы сыни наразылықтар мен ұсыныстар бойынша байыпты жұмыс істеуге дайынбыз. Айтылар сын жұмысымыздың тиімділігін арттыруға көмектесетініне сенеміз.
Данияр ЕРЕНШІНОВ,
«Азаматтарға арналған үкімет» мемлекеттік корпорациясы» коммерциялық емес АҚ-тың басқарма төрағасы
1677 рет оқылды_140_110.webp)
