Astana – Premier Tech кәсіби велокомандасының атауы 2022 жылғы маусымда Astana Qazaqstan Team болып өзгереді, деп хабарлайды "Ұлт ақпарат" ұйымның баспасөз қызметіне сілтеме жасап.
"Qazaqstan - бұл ағылшын тіліндегі транскрипциясында Қазақстанның ең дәл және дұрыс атауы. Qazaqstan - бұл қазіргі әлемдегі елдің ежелгі дәстүрлерін, тілін, мәдениетін және даму стратегиясын біріктіретін халықаралық аренадағы мемлекеттің жаңа бренді", - деп түсіндірілген жазбада.
Сондай-ақ, бұл шешімге команданың бас менеджері Александр Винокуров та пікір білдірді.
«Біздің команда Astana QazaqstanTeam атты жаңа брендпен дамитынына қуаныштымын. Бұл команда басшылығына бас менеджер ретінде қайта оралғанымды мақтан тұтамын. 16 жыл бойы «Астана» жобасы еліміздің әлемдік спорттағы визиттік карточкасы. Қазақстан Республикасының басшылығына көпжылдық қолдау мен сенім артқаны үшін алғыс айтамын. Astana Qazaqstan Team – команданың жаңа атауы ғана емес, бұл жобаның жаңартылған философиясы. Қазіргі кезеңде жаңа маусымда дайындалып жатырмыз. Сондай-ақ, қосымша жобамен де айналысудамыз. Ол туралы таяуда хабарлаймыз», - деді Винокуров.
1440 рет оқылды
