Алматыда сейсмикалық қауіпсіздікке жауапты жаңа басқарма құрылады

Сурет: Gov.kz

Алматы қаласы мәслихатының депутаттары қала әкімдігінде екі жаңа басқарма құру туралы шешім қабылдады, деп хабарлайды "Ұлт ақпарат". 

Алматы қаласы мәслихатының кезектен тыс 14-сессиясында екі жаңа басқарма құру ұсынылды.

Бірі — сейсмикалық қауіпсіздік және жұмылдыру дайындығы бөлімі.

Екіншісі — қоғамдық кеңістіктерді дамыту бөлімі.

Алматы қаласы әкімі аппаратының басшысы Бейбіт Шахановтың айтуынша, сейсмикалық қауіпсіздік және жұмылдыру дайындығы бөлімінің негізгі міндеті сейсмикалық нормалардың сақталуын қамтамасыз ету, жер сілкінісі қаупін басқару, төтенше жағдайлар кезінде тұрғындарды қарапайым дағдыларға үйрету, төтенше жағдайлар кезінде ТЖ және ТЖД жұмысын үйлестіру.

Қоғамдық кеңістіктерді дамыту департаменті басқармалар мен қала әкімдігінің жұмысын үйлестіріп, қоғамдық кеңістіктерді дамытудың жалпы принциптері мен әдістерін қамтамасыз етуді мақсат етеді. Бұл бөлім қоғамдық кеңістіктерді дамыту тұжырымдамаларын дайындауға және қала үшін маңызы бар қоғамдық кеңістіктерді жаңғыртуға жауапты болады.