Фото: ашық дереккөз
2026 жылғы 1 қаңтардан бастап паспорт, жүргізуші куәлігі және басқа да құжаттарды рәсімдеу құны өседі, деп хабарлайды Ult.kz.
Бұған айлық есептік көрсеткіш (АЕК) мөлшері 3 932 теңгеден 4 325 теңгеге көтерілуі себеп болып отыр. Бұл көрсеткіш Президент Қасым-Жомарт Тоқаев қол қойған 2026-2028 жылдарға арналған мемлекеттік бюджетте бекітілген.
2026 жылы жаңа АЕК-ке байланысты құжаттарды рәсімдеуге арналған мемлекеттік баж да қымбаттайды.
- 16 жасқа дейінгі балаға арналған паспорт (24 бет) - 17 300 теңге (4 АЕК). 2025 жылы бұл - 15 728 теңге.
- Қарапайым паспорт (36 бет) - 34 600 теңге (8 АЕК). 2025 жылы бұл - 31 456 теңге.
- 48 беттік паспорт - 51 900 теңге (12 АЕК). 2025 жылы бұл - 47 184 теңге.
- Жеке куәлік - 865 теңге (0,2 АЕК). 2025 жылы бұл - 786 теңге.
- Жеке куәлік бір жылда екі реттен көп жоғалса, 1 АЕК (4 325 теңге) төлеу қажет.
- Жүргізуші куәлігін рәсімдеу 5 406 теңге (1,25 АЕК) болады.
- Қаңтардан бастап некені тіркеу құны да өседі, куәліктің бағасы 4 325 теңге (1 АЕК) болады.
- Ерлі-зайыпты ажырасқысы келсе, мемлекеттік баж 8 650 теңгеге (2 АЕК) дейін өседі. 2025 жылы 7 864 теңге болды. Яғни некені рәсімдеуден екі есе қымбат.
- Туу туралы куәлік бұрынғыдай тегін. Бірақ оны қайта рәсімдеу қажет болса (мысалы жоғалған жағдайда), 0,5 АЕК, яғни 2 163 теңге төленеді.
Кімдер мемлекеттік баждан босатылады?
Кейбір азаматтар құжатты тегін рәсімдей алады. Олар:
- ел батырлары және жоғары мемлекеттік наградалары бар тұлғалар;
- құрметті атағы бар көпбалалы аналар;
- соғыс ардагерлері;
- мүмкіндігі шектеулі адамдар және мүгедектігі бар балалардың ата-аналары;
- әлеуметтік мекемелерде тұратын қарттар;
- жетім балалар және толық мемлекеттік қамқорлықтағы балалар;
- Чернобыль апатынан зардап шеккендер.
45 рет оқылды
_140_110.jpg)
