Jol apatynan eki aiaǵynan aiyrylǵan almatylyq áiel Ekaterina Parafieva protezben júre bastady, dep habarlaidy "Ult aqparat".
Bul týraly ol Facebook paraqshasynda jazdy.
Ol óziniń protez kiip, baldaq ustap, tik turǵan sýretin jariialaǵan.
«Men armandaǵan sýret osy. Aqyryn-aqyryn jańadan tura bastadym. Ázirge qadamdarym senimdi emes, baldaqpen turamyn. Qaz-qaz basyp úirenip jatqan bala siiaqtymyn. Tepe-teńdikti saqtap turý men úshin qiyn. Óz denemdi ózime baǵyndyrýǵa tyrysyp jatyrmyn. Aiaǵymnan tik turý úshin qai bulshyqetti qozǵasam, qulamaý úshin ne istesem degen oi ketpeidi. Men osynyń barlyǵyn igerip ketetinime sene almai turmyn. Men áli finishke jetpedim. Áli marafon júgirip kelemin», - dedi Ekaterina Parafieva.
Eske sala keteiik, E. Parafieva 16 maýsymda Almaty qalasyndaǵy ál-Farabi dańǵylynda bolǵan jol apatynan japa shekken bolatyn.
Honda CRV kóligin tizgindegen qyzdar ashyq liýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashinasyn avtobýs soqqan. Qatty soqqydan Toyota Camry ainalyp, artqy jaǵymen Honda CRV kóligin urǵan. Sonyń saldarynan qyzdar ortada qysylyp qalyp, bireýi eki aiaǵynan aiyryldy. Jarty jylǵa sozylǵan sot protsesinde avtobýs júrgizýshisi Dáýren Jańabaevtyń 2 jylǵa bas bostandyǵy shekteldi. Sonymen qatar, Jańabaev jábirlenýshige 2 mln teńge kóleminde moraldyq shyǵyn tóleýge mindetteldi.
Almatylyq kelinshek osydan 5 ai buryn Germaniianyń Mangeim qalasyna qonys aýdarǵan bolatyn.
