Túrkistan oblysy Jetisai qalasynda ógei shesheniń qorlyǵyn kórgen úsh qyz oqiǵasyna qatysty Bilim jáne ǵylym ministrligi shuǵyl is-sharalar qabyldady, dep habarlaidy "Ult aqparat" vedomstvonyń baspasóz qyzmetine silteme jasap.
«Túrkistan oblysynda aýyl mektebiniń muǵalimderi oqýshylardyń denesinen isik pen uryp-soǵý izderin baiqap, politsiia qyzmetkerlerin shaqyrǵan. Keiin aýdandyq politsiia bólimi qylmystyq is qozǵaǵan. Balalardy jábirlegen áiel birden politsiiaǵa jetkizildi. Ógei anasy balalaryn uryp-soqqan, denelerinde pyshaq izderi bar. Atalǵan is Ishki ister ministrligi, Bas prokýratýra, Bilim jáne ǵylym ministrligi tarapynan baqylaýǵa alyndy. Atalmysh fakti boiynsha tekserý jumystary júrgizilip jatyr» delingen habarlamada.
Osy oraida Bilim jáne ǵylym ministri Kúlásh Shamshidinovanyń tapsyrmasymen ministrdiń keńesshisi Raisa Sher jedel túrde Túrkistan oblysyna attandy.
Túrkistan oblystyq bilim basqarmasynyń aqparatyna sáikes, soqqyǵa jyǵylǵan oqýshy úiine jiberilmei, týǵan apasyna jetkizilip, qazirgi tańda tolyq qaýipsiz jerde.
Búgingi tańda qylmystyq kodekstiń 140-bap, 2-tarmaǵyna sáikes qylmystyq is qozǵalyp, is sotqa jiberilgen. Sonymen qatar, qamaqqa alý túrindegi jazany oryndaý boiynsha shara qoldanylǵany belgili boldy. Ata-ana quqyǵynan tek ógei anasyn ǵana emes, sondai-aq ákesin de aiyrý jónindegi suraq qarastyrylyp jatyr.
Eske salaiyq, óńirdegi áleýmettik jeli belsendisi Áset Ássandi óziniń feisbýktegi paraqshasynda Jetisai aýdanynda turatyn ógei shesheniń qyzdaryna qorlyq kórsetkeni týraly jazba taratqan bolatyn.
Onda kelinshektiń úsh jetkishek qyzǵa ine tyǵyp, tońazytqyshqa otyrǵyzyp qoiǵany jáne qaishymen denelerine jaraqat salǵany aitylady.
«Apaly-sińlili - 2003 jylǵy Salima, 2005 jylǵy Mánshúk, 2007 jylǵy Milana. Bul qarakózderimizdiń kórmegen qorlyǵy qalmapty. Ógei anasy, 1991 jylǵy Kóbeeva Juldyz fashisterden de asyp túsken siiaqty. Kámelet jasyna tolmaǵan qyzdardyń tyrnaqtarynyń astyna qaita-qaita ine tyǵyp, jylaiyn dese, uryp-soǵyp «kúlip tur» dep, jandaryna batyp tursa da, ezýlerin tartqyzyp, tońazytqyshqa birtalai ýaqyt otyrǵyzyp qinap, qaishymen denelerine jaraqat salyp, shailaryna gel qosyp berip ishkizip, tipti jynystyq múshelerin kempiraýyzben qysyp, jaraqat salyp júrgen eken. Bul qyzdardyń kórgen azaptary adam aitqysyz. Jetisaidan tabylmaǵan arashany Túrkistan oblysynyń basshylary, zań oryndarynan, densaýlyq saqtaý basqarmasynan suraimyz! Qarakózderimizdi jylatýǵa jol bermeiik! Jáne álgi ógei sheshelerin qatań jazaǵa tartaiyq» - dep jazady Áset Ássandi.
