Shymkentte 26 jastaǵy Diana Ońǵarbaevany óltirý isi boiynsha sot bastaldy. Aiyptalýshy – 11-synyp oqýshysy. Tergeý málimetinshe, ol áieldi pyshaqtap óltirip, denesin qorlaǵan. Bul týraly Ult.kz «31 arnaǵa» silteme jasap habarlaidy.
Prokýror sottyń alǵashqy otyrysynda qaiǵyly jaǵdai tamyz aiynda bolǵanyn aitty. Kúdikti jazǵy demalys kezinde tabys tabý úshin qalaǵa kelgen. Úi-jaidy tazalaý jumystarymen ainalysqan áieldi ol áleýmettik jeli arqyly taýyp, jumysqa kelisedi. Diana tazalyqty aiaqtap, 15 myń teńge eńbekaqysyn suraǵanda, jasóspirim oǵan pyshaqpen shabýyl jasaǵan.
«Kámeletke tolmaǵan aiyptalýshy qasaqana qylmys jasap, marqumnyń denesin qorlaǵan. Óz qylmysyn jasyrý maqsatynda ol áieldiń denesin qara polietilenge orap, turǵyn úidiń aýlasyndaǵy qurylys arbasyna salyp, qoqys konteineriniń janyna tastap ketken», – dedi memlekettik aiyptaýshy Nurjigit Ermentai.
Tergeý derekterine sáikes, áieldiń denesi qoqys konteineriniń janynda on kún jatqan. Keiin ony jumysshylar taýyp alǵan. Qazir sot protsesi jalǵasyp jatyr.
