Qytaidyń Shansi provintsiiasyndaǵy kómir shahtasynda bolǵan jarylys saldarynan 82 kenshi kóz jumyp, taǵy 9 adam iz-túzsiz joǵalyp ketken, dep habarlaidy ult.kz.
Qaiǵyly oqiǵa 22 mamyr kúni Tsiniýan ýezindegi Liýsheniýi kómir shahtasynda bolǵan. Bul týraly Sinhýa agenttigi málimdedi.
Apattan keiin oqiǵa ornyna Qytai Memlekettik keńesi tóraǵasynyń orynbasary Chjan Gotsin barǵan. Ol jarylystyń sebepterin jan-jaqty tekserip, kinálilerdi qatań jaýapkershilikke tartýdy tapsyrdy.
Sondai-aq vitse-premer qutqarý jumystaryn ǵylymi negizde uiymdastyryp, ekinshi rettik apattarǵa jol bermeýdi talap etken. Ol joǵalǵan adamdardyń naqty sany anyqtalyp, eshkimniń esepten tys qalmaýy kerektigin atap ótti.
Budan bólek, zardap shekkenderge úzdik meditsinalyq kómek kórsetý jáne qaza tapqandardyń otbasylaryna qoldaý bildirý jóninde tapsyrma berilgen.
Chjan Gotsin jergilikti bilikke kómir shahtalaryndaǵy eńbek qaýipsizdigin kúsheitip, zańsyz áreketterge qarsy qatań shara qabyldaýdy tapsyrdy. Ásirese qaýipsizdik monitoringi derekterin burmalaý, jer astyndaǵy jumysshylar sanyn jasyrý jáne zańsyz sýbmerdigerlikke erekshe nazar aýdarylmaq.
Qaiǵyly oqiǵaǵa bailanysty Qasym-Jomart Toqaev Si Tszinpinge jáne Qytai halqyna kóńil aityp, zardap shekkenderdiń tezirek saýyǵyp ketýin tiledi.
