Qaraǵandy oblysynyń memlekettik arhivinde aqyn jáne jazýshy Qasym Amanjolovtyń jeke muraǵat qory tanystyryldy, dep habarlaidy QazAqparat.
Onda aqynnyń ómiri men shyǵarmashylyq jolyn kórsetetin 1911–2021 jyldardaǵy 90-ǵa jýyq qujattar, sirek kezdesetin fotosýretter, sondai-aq buryn zerttelmegen qoljazbalar jinaqtalǵan.
Olardyń bir bóligin arhiv qoryna Qasym Amanjolovtyń qyzy tapsyrdy.
«Aqyn, jazýshy, pýblitsist, jýrnalist, aýdarmashy jáne Uly Otan soǵysyna qatysýshy Qasym Amanjolovtyń jeke muraǵat qory onyń týǵanyna 110 jyl tolýyna orai tanystyryldy. Qujattardy jinaý úshin biz QR ortalyq muraǵatyna baryp, Oral qalasynyń muraǵatymen hat jazystyq. Onyń qujattarynyń, jariialanymdarynyń, óleńderiniń kóshirmeleri jasaldy. Men sondai-aq aqynnyń qyzy Dariǵamen kezdestim, ol bizge onyń qujattary men fotosýretteriniń túpnusqalaryn saqtaýǵa jáne zertteý maqsatynda tabys etti», - dedi «Qaraǵandy oblysynyń memlekettik muraǵaty» KMM direktory Jańagúl Tursynova.
Qujattar negizinen túpnusqalarda, qoljazbalarda, baspa nusqalarynda, gazet jariialanymdary, sýretter, albomdar men fotosýretter túrinde usynylǵan.
«Qasym Amanjolovtyń jeke muraǵat qorynyń qujattary suranysqa ie bolady, sebebi ol ómir súrgen ýaqytty, onyń taǵdyryn, dúnietanymyn, sezimin, emotsiiasyn kórsetedi», – dep qosty Jańagúl Tursynova.
Qasym Amanjolovtyń 110 jyldyǵyna orai Qaraǵandy oblysynyń memlekettik muraǵaty aqynnyń jeke muraǵatynyń qujattaryna ǵylymi-tehnikalyq óńdeý júrgizip, «Ómirin óleńmen órnektegen» fotoqujattyq kórme uiymdastyrdy, aqyn týraly beinerolik ázirledi.
