Parlament Májilisiniń jalpy otyrysynda «Táýelsiz Memleketter Dostastyǵyna qatysýshy memleketterdiń bas bostandyǵynan aiyrýmen bailanysty emes jazalardy oryndaýdy berý týraly konventsiiany ratifikatsiialaý týraly» zań jobasy maquldandy, dep habarlaidy "Ult aqparat".
Qujatqa TMD memleketteriniń basshylary 2019 jylǵy 11 qazanda Ashǵabad qalasynda qol qoidy.
Konventsiianyń negizgi maqsaty – ár azamatqa óz jazasyn turǵylyqty jeri boiynsha óteýge múmkindik berý.
«Konventsiiaǵa sáikes sottalýshy nemese onyń zańdy ókili óz jazasyn turǵylyqty jerinde óteý týraly ótinish beredi. Ótinish boiynsha sol eldiń bas prokýratýrasy suraý salady», - dedi QR Ishki ister ministri Erlan Turǵymbaev.
Suraý salýǵa myna qujattar qosa beriledi: sottalýshynyń azamattyǵy, sot sheshiminiń kóshirmesi, minezdeme, keltirilgen shyǵyn týraly málimetter.
«Jazasyn óteýshini qabyldaityn memleket belgilengen jazadan qatań emes jaza taǵaiyndaidy. Jazasyn óteýshi sheshim qabyldaǵan soń, 45 kúnde óz betinshe elden shyǵýy tiis. Al eger bul talap oryndalmasa, zań boiynsha májbúrli túrde elden shyǵarylady. Suraý salýdan bas tartý negizderi de qarastyrylǵan. Ulttyq zańnamaǵa sáikes jazasyn óteýshiniń áreketi qylmys bolyp sanalmasa, qylmystyń merzimi ótip ketse, el táýelsizdigi men ulttyq qaýipsizdigine qaýip bolsa, ulttyq zańnamaǵa qaishy ózge de jaǵdaida bas tartylady», - dedi ministr.
Onyń aitýynsha, qazirgi ýaqytta elimizde 447 shetel azamaty probatsiiada tur. Olardyń arasynda Ózbekstannan 216, Reseiden – 138, Qyrǵyzstannan – 38, Armeniiadan 5 azamat bar. Al ózge elderde 280 Qazaqstan azamaty jazaǵa tartylǵan. Sonyń ishinde Reseide 251, Ózbekstanda – 24, Qyrǵyzstanda – 2, Belarýsta úsh azamat bar.
