Elorda meshitteri muqtaj jandarǵa azyq-túlik sómkesin taratty, dep habarlaidy QazAqparat.
Atalǵan bastama - Elorda aýmaǵyndaǵy 12 meshittiń birikken qaiyrymdylyq sharasy.
«Qazaqstan musylmandary dini basqarmasynyń tóraǵasy, bas Múfti Naýryzbai qajy Taǵanuly qasietti Ramazan aiynda jáne karantinde muqtaj jandarǵa kómektesý týraly bastama kótergen edi. Qaiyrymdylyq bastamasy bizde ǵana emes, elimizdiń barlyq meshitterinde jalǵasyn taýyp jatyr. Ár meshit óz kólemine, qarajatyna qarai kómektesedi. Búgingi shara - elorda aýmaǵyndaǵy 12 meshittiń birlese uiymdastyrýymen, demeýshi azamattardyń uiytqy bolýymen júzege asty», - dedi Áziret Sultan meshitiniń baspasóz hatshysy Aidos Imantai.
Azyq-túlik sómkeleri meshitterge júgingen muqtaj jandar tizimi boiynsha taratylady.
«Buǵan deiin meshitke kómekke júgingen kópbalaly, muqtaj, asyraýshysynan aiyrylǵan jandar bar. Olar óz jaǵdaiyn aiǵaqtaityn arnaiy qujat ótkizgen. Elorda meshitterindegi tizimderdi qarastyryp, myń otbasyna habarlastyq jáne eń qajetti degen azyq-túlik sómkesin ázirledik», - dedi A. Imantai.
